Քաղաքականություն
22.02.2023 | 14:02
Մեծ Բրիտանիայի Եվրոպայի և Հյուսիսային Ամերիկայի հարցերով պետնախարար Լեո Դոքերթին այսօր Բաքվում հանդիպել է Ադրբեջանի ԱԳ նախարար Ջեյհուն Բայրամովի հետ։ Այս մասին բրիտանացի նախարարը հայտնել է թվիթերյան գրառմամբ:
«Ես Բաքվում եմ։ Ադրբեջանը Մեծ Բրիտանիայի կարևոր առևտրային և էներգետիկ գործընկերն է: ԱԳ նախարար Ջեյհուն Բայրամովի հետ հանդիպմանն ընդգծել եմ Մեծ Բրիտանիայի հանձնառությունը տարածաշրջանում խաղաղության և անվտանգության հաստատմանը»,- գրել է Դոքերթին։
Հավելենք, որ ավելի վաղ բրիտանացի պետնախարարը հեռախոսազրույցներ էր ունեցել Հայաստանի և Ադրբեջանի ԱԳ նախարարներ Արարատ Միրզոյանի ու Ջեյհուն Բայրամովի հետ։
Բացի այդ, նա Համայնքների պալատում անդրադարձել էր Լաչինի միջանցքի փակմանը՝ նշելով, որ այն պետք է բացվի։
«Մենք ձգտում ենք վերադառնալ բանակցություններին և Լեռնային Ղարաբաղի հակամարտության խաղաղ կարգավորմանը։ Հունվարի 18-ին ես խոսել եմ Հայաստանի արտգործնախարար Միրզոյանի հետ այնտեղ հումանիտար իրավիճակի վերաբերյալ, նաև հանդիպել եմ Ադրբեջանի դեսպանին ու նշել Լաչինի միջանցքի անհապաղ վերաբացման հրատապ անհրաժեշտությունը։ «Սթարթ» հիմնադրամը, որի համար Միացյալ Թագավորությունը նշանակալի դոնոր է, հատկացրել է 350,000 ֆունտ՝ իրավիճակից տուժածներին աջակցելու համար»,- ասել էր բրիտանացի նախարարը՝ ազդարարելով, որ պատրաստվում է այցելել տարածաշրջան։
Հավելենք, որ Factor.am-ը փորձեց ՀՀ ԱԳ նախարարությունից տեղեկանալ՝ արդյո՞ք տարածաշրջանային այցի շրջանակում Լեո Դոքերթին նաև Երևան կժամանի։
«Օտարերկրյա պատվիրակությունների այցերի վերաբերյալ մենք պատշաճ ժամկետներում հայտնում ենք»,- մեր ի պատասխան՝ նշեց ԱԳՆ խոսնակ Վահան Հունանյանը։
Էմմա Չոբանյան
