25.11.2024 | 15:17
Խախտումներ շինհրապարակում. ԲԸՏՄ
ԱՄՆ-ն իր քաղաքացիներին կոչ է արել հեռանալ ՌԴ-ից՝ մոբիլիզացիայի և ձերբակալությունների ռիսկի պատճառով
Քաղաքականություն
13.02.2023 | 13:45
Միացյալ Նահանգների քաղաքացիները չպետք է ծրագրեն մեկնել Ռուսաստան, իսկ այդ երկրում գտնվողները պետք է շտապ հեռանան, զգուշացրել է Մոսկվայում ԱՄՆ դեսպանատունը։ Դիվանագիտական առաքելության կայքում հրապարակված հաղորդագրության մեջ ասվում է, որ Ռուսաստանը կարող է հրաժարվել ճանաչել երկքաղաքացիների՝ ԱՄՆ քաղաքացիությունը, զրկել հյուպատոսական օգնությունից, զորակոչել զինվորական ծառայության, ինչպես նաև թույլ չտալ նրանց հեռանալ, գրում է Forbes-ը։
Նախազգուշացման մեջ նաև մատնանշվում է «անօրինական կալանավորումների վտանգի պատճառով ավելի մեծ զգուշություն ցուցաբերելու անհրաժեշտությունը»:
Դեսպանատունը Ռուսաստանում գտնվող ԱՄՆ քաղաքացիներին խորհուրդ է տվել «խուսափել քաղաքական կամ սոցիալական բողոքներից» և չլուսանկարել հետախուզության աշխատակիցներին նման գործողությունների ժամանակ։ Ռուսաստանի իշխանությունները ձերբակալել են ցույցերին մասնակցած ԱՄՆ քաղաքացիների, ասվում է դիվանագիտական ներկայացուցչության հաղորդագրության մեջ։
«Եթե ցանկանում եք հեռանալ Ռուսաստանից, ապա պետք է հնարավորինս շուտ ինքնուրույն քայլեր ձեռնարկել։ ԱՄՆ դեսպանատունը խիստ սահմանափակումներ ունի՝ օգնելու ԱՄՆ քաղաքացիներին լքել երկիրը, և փոխադրման տարբերակները կարող են հանկարծակի է՛լ ավելի սահմանափակվել»,- զգուշացրել են դեսպանատնից:
Նախորդ անգամ Մոսկվայում ԱՄՆ դեսպանատունն ամերիկացիներին կոչ էր արել լքել Ռուսաստանը սեպտեմբերին՝ մասնակի մոբիլիզացիայի մեկնարկից հետո։
Տաթև Ֆռանգյան
