25.11.2024 | 16:50
Ճամբարակում, Սպիտակի ոլորաններում ձյուն է տեղում
Զելենսկու գրասենյակն ընդունել է Արեստովիչի հրաժարականը
Քաղաքականություն
17.01.2023 | 18:42
Ուկրաինայի նախագահի աշխատակազմն ընդունել է Ալեքսեյ Արեստովիչի հրաժարականը գրասենյակի խորհրդականի պաշտոնից։ Այս մասին հայտարարել է Վլադիմիր Զելենսկու մամուլի խոսնակ Սերգեյ Նիկիֆորովը, գրում է BBC-ի ռուսական ծառայությունը։
Ավելի վաղ Արեստովիչը սոցցանցերում հայտարարել էր, որ հրաժարականի դիմում է գրել նախագահականի աշխատակազմի խորհրդականի պաշտոնից։
Նա նման որոշում էր կայացրել Դնեպրում բնակելի շենքի հրթիռակոծման վերաբերյալ սխալ տեղեկատվություն տալու պատճառով։ Ֆեյգին Live յութուբյան ալիքի եթերում Արեստովիչը սխալմամբ հայտարարել է, որ Դնեպրում բնակելի շենքը ավերած հրթիռը, իբր, խոցվել է Ուկրաինայի հակաօդային պաշտպանության ուժերի կողմից։ Ուկրաինայի նախագահի գրասենյակի խորհրդականի այս հայտարարությունը մեջբերել են բազմաթիվ ռուսական լրատվամիջոցներ։
Ավելի ուշ Ալեքսեյ Արեստովիչը ներողություն է խնդրել եթերում ասված խոսքերի համար՝ պատճառաբանելով հոգնածությունը։
Ուկրաինայի Զինված ուժերի ռազմաօդային ուժերի հրամանատար Նիկոլայ Օլեշչուկի խոսքով՝ Ուկրաինայի զինված ուժերը «չունեն այնպիսի զենքեր, որոնք կարող են խոցել այդ տեսակի հրթիռները»։
Տաթև Ֆռանգյան
