26.02.2026 | 23:09
Գերմանացի դատախազները պնդում են, որ Մերցին «Պինոկիո» անվանելը խոսքի ազատության դրսևորում է
Չավուշօղլուն ԱՄՆ-ին հորդորել է հավասարակշռություն պահպանել Անկարայի և Աթենքի հետ հարաբերություններում
Քաղաքականություն
16.01.2023 | 16:54
Թուրքիայի ԱԳ նախարար Մևլութ Չավուշօղլուն հայտարարել է, որ ԱՄՆ-ը պետք է պահպանի հավասարակշռությունը Թուրքիայի և Հունաստանի հետ հարաբերություններում։ Այս մասին Չավուշօղլուն ասել է բոսնիացի իր գործընկերոջ հետ Անկարայում տեղի ունեցած մամուլի ասուլիսի ժամանակ, գրում է Անադոլու գործակալությունը։
Խոսելով Հունաստանին ամերիկյան զինատեսակների, այդ թվում՝ F-35-երի մատակարարման լուրերի մասին՝ նա նշել է, որ վերջին տարիներին ԱՄՆ-ը հրաժարվել է Աթենքի ու Անկարայի միջև հավասարակշռության կուրսից, որն անդրադառնում է նաև Արևելյան Միջերկրականում իրավիճակի վրա։
Չավուշօղլուի խոսքով՝ Վաշինգտոնի կողմից Կիպրոսին զենք մատակարարելու էմբարգոյի մերժումը նույնպես վնասում է կղզում տիրող իրավիճակին։
«Այնպիսի դաշնակիցը, ինչպիսին ԱՄՆ-ն է, պետք է հավասարակշռություն պահպանի»,- ընդգծել է թուրք պաշտոնյան։
Անդրադառնալով ԱՄՆ-ից F-16 ինքնաթիռների գնման Անկարայի հայտին, ինչպես նաև Թուրքիայի ռազմաօդային ուժերի հաշվեկշռում առկա այդ ինքնաթիռների պարկի արդիականացմանը՝ Չավուշօղլուն ասել է, որ այդ հարցը կարևոր է ոչ միայն Թուրքիայի, այլև ՆԱՏՕ-ի ներուժի համար։
«Եթե ԱՄՆ վարչակազմն այս հարցում հավատարիմ մնա վճռական մոտեցմանը, ապա խնդիրներ չեն լինի»,- ասել է նա։
Չավուշօղլուն նաև հայտնել է, որ հունվարի 18-ին Վաշինգտոնում իր ամերիկացի գործընկեր Էնթոնի Բլինքենի հետ նախարարների մակարդակով կանցկացվի Ռազմավարական մեխանիզմի երկրորդ հանդիպումը։
Էմմա Չոբանյան
