24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
ՀԱՊԿ-ը վտանգի բաղադրիչ է․ ՀՀ-ն ճիշտ արեց՝ զորավարժությունից հրաժարվելով․ Անահիտ Ադամյան․ ՏԵՍԱՆՅՈՒԹ
Քաղաքականություն
13.01.2023 | 20:32
ԱՄՆ Ներկայացուցիչների պալատի արդեն նախկին խոսնակ Նենսի Փելոսիի՝ սեպտեմբերին Հայաստան այցից հետո այսօր ևս մեկ բարձրաստիճան այցելություն կայացավ։ Երևան է ժամանել Ֆրանսիայի ԱԺ-ի նախագահ Յաել Բրոն-Պիվեն։ Նա Ալեն Սիմոնյանի հետ ասուլիսում ասել է՝ ամեն ինչ կանեն, որպեսզի խուսափեն ԼՂ-ում մարդասիրական աղետից։ Ըստ նրա՝ Ֆրանսիան հավատում է, որ ՀՀ-ն կարող է որոշակի խաղաղ լուծում գտնել Ադրբեջանի հետ՝ Փարիզը ՀՀ-ի կողքին է։
Ֆրանսիան նաև կդիմի ԵՄ-ին՝ Հայաստան-Ադրբեջան սահման ևս մեկ առաքելություն բերելու հարցով։ ԼՂ փաստահավաք առաքելություն ուղարկելու մասով հարց բարձրացրեց՝ ՀՀ-ն դիմե՞լ է Ֆրանսիային այդ հարցով, թե՞ ոչ։ Նշեց՝ Ուկրաինան դիմել էր, և ուղարկեց փորձագետների։
Ալեն Սիմոնյանն էլ արձագանքեց․ «Ֆրանսիան անում է ամեն ինչ՝ ՀՀ-ի և հայ ժողովրդի շահերը պաշտպանելու, ռեգիոն խաղաղություն բերելու համար, բայց մեզ Ֆրանսիան պետք է ոչ թե որպես կողմ, այլ միջնորդ»։
Ֆրանսիան նաև 2 անգամ ՄԱԿ-ի ԱԽ է դիմել՝ Ադրբեջանի հարձակման և ԼՂ-ի շրջափակման հարցերով, Պրահայում Փաշինյան-Ալիև հանդիպման գործում է միջնորդ։ Արևմտյան բարձրաստիճան այսպիսի այցերի ժամանակ ՌԴ-ի հետ խորքային ինտեգրումը նախընտրող որոշ ուժեր հարց են բարձրացնում, թե Արևմուտքը ՀՀ-ի հետ ոչ թե արժեքային, անվտանգային, տնտեսական գործակցության նպատակ ունի, այլ սա բացառապես՝ ՀՀ-ն ՌԴ-ի դեմ պլացդարմ դարձնելու պրոցես է։
«Հանրապետություն» կուսակցության անդամ, հրապարակախոս Անահիտ Ադամյանը տարակուսանքով է մոտենում նման գնահատականներին։
«Ցավում եմ, որ այսքան իրադարձություններից հետո որոշ մարդիկ դեռ այդպիսի կարծիք են հայտնում։ Հակառուսական պլացդա՞րմ, թե՞ ռուսական ֆորպոստ․․․ ՀՀ-ն չի եղել, չէ և չպիտի լինի։ Այդ մարդիկ այն տեսակետին են, որ ՀՀ-ն արդեն ՌԴ-ի կազմում է, և պետք է կատարի ՌԴ-ի դաշնային սուբյեկտ-միավորի դերը։ ՀՀ-ն անկախ պետություն է։ Եվ եթե այդ մարդիկ հասկանան սա, նման հայտարարություն չեն անի»,- նշեց հրապարակախոսը։
Անահիտ Ադամյանը զարմացած է նաև, որ երբ Լաչինի միջանցքը փակված է, ՀՀ ԱԺ ընդդիմությունը քննարկման հարց է դարձրել ՀՀ-ում ՀԱՊԿ-ի զորավարժություններ չիրականացնելու հարցը։
«Զորավարժությունն անվանվում է «Անքակտելի եղբայրություն»։ Որտե՞ղ եք տեսել այդ անքակտելի եղբայրությունը, ՀԱՊԿ-ի շրջանակում ՀՀ-ի նկատմա՞մբ։ Դա միանգամայն խախտվող եղբայրություն է։ ՀԱՊԿ-ն իրականում վտանգի բաղադրիչ է և ՀՀ-ն ճիշտ է արել, որ հրաժարվել է դրանց անցկացումից»,- նշեց «Հանրապետություն» կուսակցության անդամը։
Հարցազրույցն ամբողջությամբ՝ տեսանյութում։
Ռոբերտ Անանյան
