16.09.2026 | 11:22
«Արարատ-Արմենիան» մեկնարկում է Եվրոպա լիգայի հիմնական փուլում
Լեհաստանն ու Լիտվան Ուկրաինային տանկեր և ՀՕՊ համակարգեր կմատակարարեն
Քաղաքականություն
12.01.2023 | 16:54
Լիտվան և Լեհաստանը կշարունակեն պաշտպանական օգնություն ցուցաբերել Ուկրաինային։ Այս մասին վստահեցրել են երկու երկրների նախագահները, որոնք Լվովում հանդիպել են իրենց ուկրաինացի գործընկեր Վլադիմիր Զելենսկու հետ, գրում է Euronews-ը։
Խոսքից գործի անցնելով՝ Անջեյ Դուդան հայտարարել է, որ Լեհաստանը Ուկրաինային կփոխանցի գերմանական արտադրության Leopard տանկերի մեկ ստորաբաժանում՝ ընդհանուր 14 միավոր։ Նշենք, որ երեքշաբթի Ուկրաինայի արտգործնախարար Դմիտրի Կուլեբան Գերմանիայից «Հովազներ» էր խնդրել իր գերմանացի գործընկեր Աննալենա Բերբոկի Խարկով կատարած այցի ժամանակ։
Իր հերթին, Լիտվայի նախագահ Գիտանաս Նաուսեդան հայտարարել է, որ անհրաժեշտ զինամթերքի հետ միասին՝ ՀՕՊ համակարգեր և զենիթային համալիրներ կմատակարարեն Ուկրաինային։
Վլադիմիր Զելենսկին շնորհակալություն է հայտնել իր գործընկերներին այցի և աջակցության համար, իսկ նրա խորհրդական Միխայիլ Պոդոլյակը AFP-ին տված հարցազրույցում ասել է, որ Ուկրաինան կարող է արդեն այս տարի հաղթել պատերազմում, եթե Արևմուտքը նրան մատակարարի ավելի հզոր ռազմական տեխնիկա, այդ թվում՝ ծանր տանկեր և հեռահար հրթիռներ։ Պոդոլյակը վստահեցրել է, որ հրթիռները կօգտագործվեն միայն ռուսական թիկունքը թուլացնելու, բայց ոչ Ռուսաստանի Դաշնության տարածքի վրա հարձակվելու համար։
Նախագահ Զելենսկին Լվովում անցկացրել է նաև համակարգող մարմնի խորհրդակցություն, որի ժամանակ Բելառուսին սահմանակից շրջանների ղեկավարներին զգուշացրել է, որ պետք է մշտապես բարձր զգոնություն պահպանեն։ Չնայած Մինսկը մինչ այժմ դիմակայել է Մոսկվայի ճնշմանը և չի մտել պատերազմի մեջ, սակայն Ռուսաստանի և Բելառուսի բանակների համատեղ զորավարժությունները անհանգստության տեղիք են տալիս Կիևին։
Հավելենք նաև, որ Թուրքիան հերքել է մամուլում տարածված տեղեկությունը, թե մտադիր է Ուկրաինային փոխանցել DPICM կասետային տիպի հրետանային զինամթերք։
Տաթև Ֆռանգյան
