Քաղաքականություն
12.01.2023 | 14:21
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում անդրադարձել է նաև Լաչինի միջանցքի ապաշրջակմանն ուղղված Մոսկվայի ջանքերին։
«Մենք շարունակում ենք աշխատանքները դրա ամբողջական ապարգելափակման համար՝ համաձայն 2020 թվականի նոյեմբերի 9-ի հայտարարության։ ՌԴ ՆԳՆ-ի, ՊՆ-ի և ռուս խաղաղապահների հրամանատարության գծով հետևողական քայլեր են ձեռնարկվում ապաէսկալացիայի համար։ Անհրաժեշտ է ընդունելի որոշում գտնել բոլոր կողմերի համար։ Ներկայում միջանցքով անցնում են հումանիտար բեռներով շարասյուններ»,- ասել է Զախարովան՝ չնշելով, սակայն, թե ինչ հումանիտար բեռների մասին է խոսքը, քանի որ ռուսական կողմը որևէ հումանիտար օգնություն չի տրամադրել։
Ըստ Զախարովայի՝ Մոսկվան անընդունելի է համարում «ռուս խաղաղապահների դեմ հանրային հայտարարություններն ու սադրանքները, քանի որ նրանք տարածաշրջանում խաղաղության երաշխավորն են»։
Խոսելով ՄԱԿ-ի ԱԽ փաստաթղթի հետ կապված հարցի մասին, որը չէր ընդունվել հենց Մոսկվայի պատճառով, Զախարովան նշել է, որ կազմակերպությունում ՌԴ մշտական ներկայացուցչությունն արդեն պատասխանել է այդ հարցին։
«Փաստաթղթի ֆրանսիացի հեղինակները, չնայած մեր կառուցողական դիրքորոշմանը, արհամարհել են ռուսական առաջարկների մեծ մասը։ Մեր արևմտյան գործընկերներն իրենց մեջ քաջություն չգտան տեքստում ներառել, մասնավորապես, Հայաստանի, Ադրբեջանի և ՌԴ ղեկավարների հայտարարությունները, որոնք հայ-ադրբեջանական կարգավորման բազան են»,- ասել է Զախարովան։
Նա նշել է, որ հայ-ադրբեջանական սահմանի դելիմիտացիայի հետ կապված Մոսկվան պաշտպանում է երկկողմ հանձնաժողովի աշխատանքները, այդ թվում՝ քարտեզագրական տվյալների փոխանցման հարցում։
Էմմա Չոբանյան
