«Նենց հարցեր եք տալիս, պարզ գրված են նախագծում»․ ԱԱԾ փոխտնօրենը բարկացավ Արծվիկ Մինասյանի հարցից․ ՏԵՍԱՆՅՈՒԹ

ԱԺ պետական-իրավական հարցերի հանձնաժողովի նիստում «Պետական գաղտնիքի մասին» և «Ազգային անվտանգության մարմինների մասին» օրենքում և կից ներկայացված օրենքներում փոփոխություններ կատարելու մասին նախագծերի փաթեթի քննարկման ժամանակ «Հայաստան» խմբակցության պատգամավոր Արծվիկ Մինասյանը, դիմելով նախագծի հիմնական զեկուցող ՀՀ ազգային անվտանգության ծառայության տնօրենի տեղակալ Տիգրան Հարությունյանին, խնդրեց պարզաբանել պետական գաղտնիք պարունակող տեղեկություններ հասկացության և պետական գաղտնիք հասկացությունների տարբերությունը։

«Եթե դրանք նույնն են, իմաստը ո՞րն է կրկնելու։ Ըստ նախագծի ձևակերպման՝ պետական գաղտնիք է համարվում այն տեղեկությունը, որը համարվում է պետական գաղտնիք։ Այլ բացատրություն այս հասկացության ներքո չկա, բացի նրանից, որ դա վնասում է ՀՀ ազգային անվտանգությանը կամ շահերին․․․ Սա ոչինչ չասող սահմանում է։  

Երկրորդ՝ ի՞նչ մեթոդաբանությամբ է որոշվում վնաս պատճառելու չափը, քանի որ նշեցիք, որ կարևոր է լինելու վնասի չափի գնահատումը, և դասակարգման մեջ նշված է՝ հատուկ կարևորության, գաղտնի կամ հույժ գաղտնի տեղեկությունների դեպքում վնասի չափը տարբեր է»։ 

Պատգամավորը հարց ուղղեց նաև պետական գաղտնիքի՝ տեղեկությունների գաղտնագրման սկզբունքների վերաբերյալ։  

Տիգրան Հարությունյանն արձագանքեց՝ նշելով․ «Օրենքի երրորդ հոդվածի առաջին կետը վերաբերում է տեղեկություններին, նյութերին, արտադրանքներին, որոնք պարունակում են պետական գաղտնիք, իսկ երրորդը՝ ընդհանուր պետական գաղտնիք հասկացողությանը, թե որն է համարվում պետական գաղտնիք։ Դրանք տարբեր են»։ 

Անդրադառնալով Միանսյանի դիտարկմանը, որ հստակ սահմանում չի տրվել, ԱԱԾ փոխտնօրենը բարկացավ․ «Նենց հարցեր եք տալիս, որ պարզ գրված են նախագծում»։ 

Մանրամասները՝ տեսանյութում։ 

Օրակարգում՝ «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն և լրացումներ կատարելու մասին» նախագիծ, «Պետական գաղտնիքի մասին» նախագիծ։

«Նենց հարցեր եք տալիս, պարզ գրված են նախագծում»․ ԱԱԾ փոխտնօրենը բարկացավ Արծվիկ Մինասյանի հարցից։