17.05.2026 | 19:49
Մենք մի հատ «ջարդված մատ» ունենք, անունը՝ Նիկոլ Փաշինյան, որը պետք է պոկենք և վռնդենք․ Քոչարյան․ ՏԵՍԱՆՅՈւԹ
Զելենսկին Ուկրաինայի քաղաքացիությունից զրկել է Մեդվեդչուկին ու Ռադայի ևս երեք ռուսամետ պատգամավորների
Քաղաքականություն
11.01.2023 | 13:19
Վլադիմիր Զելենսկին Ուկրաինայի քաղաքացիությունից զրկել է քաղաքական գործիչներ Վիկտոր Մեդվեդչուկին, Տարաս Կոզակին, Ռենատ Կուզմինին և Անդրեյ Դերկաչին։ Այս մասին Ուկրաինայի նախագահը հայտնել է իր ավանդական երեկոյան տեսաուղերձի ժամանակ։ Բոլոր չորս քաղաքական գործիչներն Ուկրաինայում «ռուսամետ» համարվող «Ընդդիմադիր հարթակ՝ հանուն կյանքի» կուսակցության ներկայացուցիչներ են եղել։ Անցյալ տարվա հունիսին այս կուսակցության գործունեությունը երկրում պաշտոնապես արգելվել է, գրում է VOA-ն։
Մինչև 2022 թվականի սեպտեմբերը Վիկտոր Մեդվեդչուկը, որը Վլադիմիր Պուտինի կնքահայրն է, Ուկրաինայում պետական դավաճանության մեղադրանքով կալանքի տակ էր։ Սեպտեմբերին նրան փոխանակեցին ռուսական գերության մեջ գտնվող Ազովի գնդի հրամանատարների հետ։ Արևմտյան մի շարք լրատվամիջոցներ հայտնել են, որ Պուտինն անձամբ է համաձայնել այս փոխանակմանը։ Մինչ այս, ռուսական իշխանությունները գերեվարված «ազովցիների» համար տրիբունալ էին հայտարարել։
Գերագույն Ռադայի ֆինանսների, հարկային և մաքսային քաղաքականության հանձնաժողովի նախկին անդամ Տարաս Կոզակը եղել է մի քանի ուկրաինական հեռուստաալիքների սեփականատեր, մասնավորապես՝ «News One», «ZIK» և «112 Ukraine»: 2021 թվականին դրանց հեռարձակումը դադարեցվեց, և քաղաքական գործչի դեմ քրեական գործ հարուցվեց պետական դավաճանության մեղադրանքով. Ուկրաինայի քննչական կոմիտեն հայտարարեց, որ Կոզակի ընկերությունները ֆինանսավորվում են ռուսական իշխանամետ կառույցների կողմից։
Նմանատիպ գործեր են հարուցվել Ռենատ Կուզմինի և Անդրեյ Դերկաչի նկատմամբ։ Հետաքննության նյութերի համաձայն՝ Կուզմինը ուկրաինական տարածք ռուսական լայնամասշտաբ զինված ներխուժման նախօրեին ԶԼՄ-ներում տեղադրել է «Ուկրաինայի դեմ քարոզչական նյութեր»։
Դերկաչին, իր հերթին, մեղադրել են Ռուսաստանի ԱԴԾ-ում աշխատելու համար. Ուկրաինայի քննչական կոմիտեի տվյալներով՝ նա գործակալական ցանցի մաս է եղել։ Անցյալ տարվա դեկտեմբերին քաղաքական գործիչը նաև հայտնվել էր ԱՄՆ պատժամիջոցների տակ՝ նախագահական ընտրություններին միջամտելու համար։ Ամերիկյան հետախուզական ծառայությունները ևս Դերկաչին համարում են ԱԴԾ գործակալ։
Պատերազմի բռնկումից հետո Կոզակը, Կուզմինը և Դերկաչը լքել են Ուկրաինան, նրանց գտնվելու վայրը ներկայում հայտնի չէ։
Տաթև Ֆռանգյան
