20.02.2026 | 11:15
Դպրոցի նկատմամբ հարուցվել և իրականացվել է վարչական վարույթ, տնօրենի տրվել է կարգադրագիր․ ՀՀ կրթության տեսչական մարմին
Պառավաքարից, Բերքաբերից կան օկուպացված տարածքներ, կա Արծվաշենի հարցը. Փաշինյան․ ՏԵՍԱՆՅՈՒԹ
Քաղաքականություն
10.01.2023 | 15:49
Դելիմիտացիայի գործընթացում շատ հարցեր կան, որոնք պետք է կարգավորվեն։ Հիմա ասում են՝ անկլավների թեման կա, մենք էլ ունենք այդ թեման, Արծվաշենը ՀՀ ինքնիշխան տարածքի մաս է, որն այսօր Ադրբեջանի վերահսկողության ներքո է»,- այսօր հրավիրած ասուլիսում այս մասին նշեց վարչապետ Նիկոլ Փաշինյանը։
Վարչապետի դիտարկմամբ՝ կան թեմաներ, որոնք օգտագործվում են այդ թվում՝ հայ հանրության նկատմամբ հոգեբանական ճնշում գործադրելու համար, նաև որոշակի ցնցումներ առաջացնելու համար։
«Հայաստանի տարածքներ կան օկուպացված, ընդ որում, 1990 թվականից այս կողմ Հայաստանի օկուպացված տարածքներ կան։ Օրինակ՝ Տավուշի մարզի Պառավաքար գյուղի հողատարածքների մեծ մասը օկուպացված են, նաև Բերքաբեր, Վազաշեն գյուղի»,- հավելեց Փաշինյանը՝ հավելելով, որ այդ հարցերը քննարկվելու են դելիմիտացիայի ու դեմարկացիայի շրջանակներում։
«Չպետք է խուճապի մատնվել, կան հարցեր, որոնք հայկական կողմն է առաջ քաշում, կան հարցեր, որոնք իրենք են առաջ քաշում։
Ադրբեջանում Հայաստանից գաղթած քաղաքացիների մարդահամար են անում։ ՀՀ տարածքում ադրբեջանցիների նկատմամբ բռնություն ընդհանրապես չի գործադրվել, տունը վաճառել, գնացել են։
Բայց Սումգայիթի ու Բաքվի ջարդեր ենք ունեցել, մենք Ադրբեջանից բռնագաղթած քանի՞ մարդ գիտենք, որ տունը վաճառելու հնարավորություն է ունեցել, այդ մարդկանց գույքային հարցը կա, չէ՞։ Ինչքա՞ն մարդ է Ադրբեջանից բռնագաղթել, բոլորը հույս ունեն, որ նաև այս հայտարարությունների հիման վրա իրենց գույքային իրավունքները պաշտպանելու նպատակով Հայաստանի համապատասխան մարմիններին կդիմեն։
Պետք չէ վախենալ, շատ լավ, անկլավի հարց կա, պնդում կա, որ հարց կա, մենք էքսկլավի հարց ունենք՝ Արծվաշենի հարցը։ Օկուպացված գյուղերի հարց կա՞, իհարկե, կա։ Օրինակ՝ Պառավաքար, Այգեհովիտ, Վազաշեն, Բերքաբեր և այլն։ Մեզ պետք է գնալ, այդ հարցերը լուծել և կրել պատասխանատվությունը։ Լուծումները երազանքի լուծում չեն լինելու, բայց պետք է գնալ լուծումների։
Մեր պետականության լինելությունն ապահովելու համար անհրաժեշտ է, որ մենք մեր տարածաշրջանում հարաբերությունների որակը փոխենք։ Արդյոք բոլո՞րն են դա ուզում, վստահ չեմ։ Հնարավոր է, որ չհաջողվի, որովհետև այստեղ միայն տարածաշրջանի շահերը չեն, շատ ուրիշ շահեր կան»,- նշեց Փաշինյանը։
Նրա դիտարկմամբ՝ 1990 թվականից սկսած՝ հետևյալ հարցն է դրված․ «Հայաստանի պետականության հարցն է դրված, թե ՀՀ-ն ինչ տիպի և որակի պետություն է լինելու, և լինելո՞ւ է, թե՞ ոչ»։
Մանրամասները՝ տեսանյութում։
