Քաղաքականություն
10.01.2023 | 14:35ՀԱՊԿ-ի զորավարժությունը թուրք-ադրբեջանական տանդեմի համար կարող է սպառնալիք ստեղծել ։ Այս մասին այսօր հրավիրված ասուլիսում հայտարարեց ՀՀ վարչապետ Նիկոլ Փաշինյանը՝ անդրադառնալով հարցին, թե ինչո՞ւ Հայաստանը նպատակահարմար չի գտնում Հայաստանում ՀԱՊԿ զորավարժություն անցկացնելուն։
«ՀԱՊԿ-ը եկավ, թուրք-ադրբեջանական տանդեմի համար սպառնալիքը ստեղծեց, հետո ասաց՝ ցտեսություն, դե մենք գնացինք․․․ Մենք ասում ենք՝ եկեք, հասկանանք՝ ՀԱՊԿ-ի պատասխանատվության գոտին ո՞րն է, որից հետո մեր հարաբերությունները ինստիտուցիոնալ և խորը կառուցենք։ ՀԱՊԿ-ը չի ասում, թե իր պատասխանատվության գոտին որն է, դա մեզ համար ֆունդամենտալ պրոբլեմ է։ Այսինքն՝ ՀԱՊԿ-ը չի արձանագրում, թե որտեղով է անցնում կարմիր գիծը»,- նշեց Փաշինյանը։
Անդրադառնալով հարցին, թե արդյոք Հայաստանի իշխանությունները վախվորած կամ խաղաղություն մուրալու քաղաքականություն են վարում․ «Ինչպես Վազգեն Սարգսյանն էր ասում՝ ես վախենում եմ ոչնչից չվախեցողներից։ Մենք պետք է մաքսիմալ պատասխանատու գործենք․․․ Ես համաձայն եմ, որ խաղաղություն մուրալով խաղաղություն ունենալ հնարավոր չէ։ Խաղաղություն հնարավոր է ունենալ դա վաստակելով․․․
Խաղաղության կարելի է հասնել՝ դիտանկյունները, ռակուրսները որոշակիորեն փոխելով, իրողությունները ճիշտ գնահատելով, մաքսիմալ հաշվարկված քայլեր անելով, Հայաստանի դերը և նշանակությունը միջազգային ասպարեզում մեծացնելով, Հայաստանի ինստիտուցիոնալ ավելի բարձր կայացվածության մակարդակով, տարածաշրջանում հարաբերությունները փոխելով և այդպես շարունակ»։
Փաշինյանը կարծիք հայտնեց, որ Հայաստանը կարող է խաղաղություն ունենալ, եթե ի վիճակի լինի հանդուրժող հարաբերություններ հաստատել Թուրքիայի ու Ադրբեջանի հետ, նաև զարգացնել հարաբերությունները Իրանի ու Վրաստանի հետ: «Սա է խաղաղության բանաձևը, իհարկե, միջազգային հանրության այն ռեսուրսները, որ կարող են մեզ օգնել այս հարցում, այդ ռեսուրսն էլ պետք է անպայման օգտագործել», – նշեց վարչապետը։
Փաշինյանը նաև հայտարարեց․ «Ես ՀԱՊԿ-ի վրա հույս դնում եմ, այլ բան, որ ՀԱՊԿ-ը կարող է հուսախաբ անել։
Իսկ Ադրբեջանի ու Թուրքիայի հետ հարաբերությունների կարգավորմանը հավատում եմ մեկ պատճառով՝ որևէ բան անելուց առաջ պետք է հավատալ: Եթե չենք հավատում, ինչի՞ ենք բանակցում, ձև ենք անո՞ւմ»։
Մանրամասները՝ տեսանյութում։
