Լաչինի միջանցքում ռուս խաղաղապահների տեղակայումից հետո գերեվարվել են ՀՀ քաղաքացիներ․Փաշինյան․ ՏԵՍԱՆՅՈՒԹ

ՀՀ իշխանությունը ռուս խաղաղապահներին չի քննադատում, այլ միայն նրանց գործունեության վերաբերյալ իր մտահոգություններն է արտահայտում։ Այս մասին այսօր հրավիրված ասուլիսի ժամանակ հայտարարեց վարչապետ Նիկոլ Փաշինյանը՝ ի պատասխան այն դիտարկման, որ եթե նախկինում միայն Ադրբեջանն էր խաղաղապահներին քննադատում, ապա այսօր ՀՀ իշխանությունները ևս քննադատություններ հնչեցնում` քաջ գիտակցելով, որ նրանց մանդատը սահմանափակվում է ուժ չկիրառելով։

Անդրադառնալով հարցին, թե Երևանը որքանով է ներգրավված ռուսական կողմի հետ բանակցություններում, արդյո՞ք վարչապետը անձամբ հանդիպել ու քննարկել է Լաչինի իրադարձությունները խաղաղապահ զորախմբի հրամանատար Անդրեյ Վոլկովի հետ, Փաշինյանը նշեց․ «Մենք խաղաղապահներին չենք քննադատում, այլ մեր մտահոգույթուններն ենք հայտնում, որոնք վաղուցվա ծագում ունեն: Ես անընդհատ մեր ռուս գործընկերների ուշադրությանն եմ հրավիրել, որ Ադրբեջանում սկսվել է ռուս խաղաղապահների վարկաբեկման պետական արշավ։ Դա ակնհայտ է և շարունակում է ակնհայտ մնալ։

Ոչ ոք չի վիճարկում, որ ռուս խաղաղապահներն են ԼՂ ժողովրդի անվտանգությունն ապահովում: Բայց մենք ունենք Փառուխի դեպքերի նախադեպը, երբ ադրբեջանցիները մուտք են գործել ՌԴ խաղաղապահների պատասխանատվության գոտի և մենք, ըստ էության, ոչ մի արձագանք չենք տեսել: Բացի այդ, խաղաղապահների պատասխանատվության գոտում` Խծաբերդում, ՀՀ քաղաքացիներ գերեվարվեցին»,- նշեց Փաշինյանը։

ՀՀ վարչապետը հիշեցրեց, որ Լաչինի միջանցքում ռուս խաղաղապահների տեղակայումից հետո գերեվարվել են ՀՀ քաղաքացիներ, որոնք առնչություն չունեն ռազմական գործողությունների հետ։

«Սրանք հարցեր են, որոնք պետք է պատասխան ստանան։ Լավ, մենք բերաններս ջուր առած-նստա՞ծ ենք, թե զբաղվում ենք այս հարցերով։ Մենք այս հարցերով զբաղվում ենք, և ոչ թե ՌԴ խաղաղապահ զորախմբի հրամանատարի, այլ ՌԴ խաղաղապահների գերագույն հրամանատարի հետ»։

Մանրամասները՝ տեսանյութում։