17.12.2025 | 20:23
Նազիկ Ավդալյան․ Քաղաքականությամբ զբաղվելու նպատակ չունեմ
ԱՄՆ Պետքարտուղարությունն Ադրբեջանին կոչ է արել անհապաղ ազատ արձակել ձերբակալված ընդդիմադիր գործիչներին
Քաղաքականություն
10.01.2023 | 16:33
ԱՄՆ Պետքարտուղարությունը դատապարտել է Ադրբեջանում մարդու իրավունքների վերջին խախտումները՝ կապված ընդդիմադիր գործիչ Թոֆիգ Յագուբլուի, ակտիվիստ և իրավապաշտպան Բախտիյար Հաջիևի կալանավորման հետ, որոնք նաև հացադուլ են հայտարարել։ Այս մասին ճեպազրույցում հայտարարել է գերատեսչության խոսնակ Նեդ Փրայսը։
«Մենք խորապես անհանգստացած ենք Բախտիյար Հաջիևի և Թոֆիգ Յագուբլուի ձերբակալությունից և կալանավորումից: Մենք կոչ ենք անում իշխանություններին անհապաղ նրանց ազատ արձակել։ Մենք խստորեն հավատարիմ ենք մնում մարդու իրավունքների և հիմնարար ազատությունների նկատմամբ հարգանքի առաջխաղացմանը: Եվ կրկին կոչ ենք անում կառավարությանը՝ հարգել իր քաղաքացիների իրավունքները, այդ թվում՝ խաղաղ կերպով կարծիք արտահայտելու իրավունքը»,- ասել է Փրայսը։
Հավելենք, որ Հաջիևը ձերբակալվել է անցյալ տարվա դեկտեմբերի սկզբին՝ «խուլիգանության» և «դատարանի նկատմամբ անհարգալից վերաբերմունքի» մեղադրանքով։ Այս մեղադրանքներն իրավապաշտպան կազմակերպությունների կողմից համարվում են քաղաքական դրդապատճառներ։
Յագուբլուն էլ ձերբակալվել է դեկտեմբերի 23-ին Բաքվում՝ Հաջիևի ազատ արձակման պահանջով բողոքի ակցիայի ժամանակ։ Նա արդեն 6 օր է՝ հացադուլի մեջ է։ Յագուբլուի կինն ու այլ ակտիվիստներ, ի համերաշխություն նրա, նույնպես հացադուլ են հայտարարել։
Էմմա Չոբանյան
