Բրիտանիայի տարածքից արձակված հրթիռը չի կարողացել ուղեծիր դուրս գալ

Հունվարի 9-ի լույս 10-ի գիշերը ամերիկյան Virgin Orbit ընկերության կողմից արձակված LauncherOne հրթիռը «անոմալիայի» պատճառով չի կարողացել հասնել Երկրի ուղեծիր, հայտնել են մամուլի ծառայությունից։ Սա Virgin Orbit-ի կողմից Մեծ Բրիտանիայի տարածքից ուղեծիր տիեզերական սարքի առաջին արձակումն էր, գրում է DW-ի ռուսական ծառայությունը:

Հրթիռ-կրիչը, որը պետք է ուղեծիր դուրս բերեր 9 արբանյակ, գտնվում էր «Cosmic Girl» կոչվող մոդիֆիկացված Boeing-747-ում։ Այն օդ է բարձրացել հունվարի 9-ի ուշ երեկոյան Անգլիայի հարավ-արևմուտքում գտնվող Նյուքեյ օդանավակայանից:

Թռիչքից մեկուկես ժամ անց, գտնվելով Ատլանտյան օվկիանոսից 10,7 կմ բարձրության վրա, ինքնաթիռն արձակել է հրթիռը, սակայն չի հաջողվել հաջողությամբ ավարտին հասցնել «Start Me Up» կոչվող առաքելությունը։ Հրթիռն արձակման առաջին փուլում գործի է դրել շարժիչը և սկսել է վերելքը դեպի Երկրի ցածր ուղեծիր, բայց չի կարողացել ավարտել այն:

Այդ ընթացքում Boeing 747-ը բարեհաջող վայրէջք է կատարել Քորնուոլում։ Հաղորդվում է, որ արբանյակները, որոնք պետք է ուղեծիր դուրս բերեր LauncherOne հրթիռը, կարող են օգտագործվել ինչպես քաղաքացիական, այնպես էլ ռազմական նպատակներով։

Բրիտանացի միլիարդատեր Ռիչարդ Բրենսոնի Virgin Orbit-ը, որը տեղակայված է Քալիֆորնիայում, 2021 թվականից ի վեր ԱՄՆ-ի տարածքից հաջողությամբ չորս նմանատիպ հրթիռ է իրականացրել Խաղաղ օվկիանոսի վրայով:

Նյուկի օդանավակայանն այն յոթ տիեզերական կայաններից է, որը պատրաստվում է զարգացնել Մեծ Բրիտանիան:

Ակնկալվում է, որ 2023 թվականի ընթացքում առաջին ուղղահայաց հրթիռի արձակումը կիրականացվի Շոտլանդիայում։ Մեծ Բրիտանիայի կառավարությունն ակնկալում է, որ թագավորության տիեզերական արդյունաբերության շուկան առաջիկա 10 տարիների ընթացքում կկազմի 3,8 միլիարդ ֆունտ (4,3 միլիարդ եվրո):

Տաթև Ֆռանգյան