20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Կիևը պաշտոնապես կբարձրացնի ՄԱԿ-ի Անվտանգության խորհրդում Ռուսաստանի հետագա ներկայության հարցը
Քաղաքականություն
26.12.2022 | 17:05
Ուկրաինան ծրագրում է դեկտեմբերի 26-ին բարձրացնել ՄԱԿ-ի Անվտանգության խորհրդում ՌԴ-ի հետագա ներկայության հարցը։ Այս մասին հայտարարել է Ուկրաինայի ԱԳ նախարար Դմիտրի Կուլեբան, գրում է DW-ի ռուսական ծառայությունը։
«Վաղը մենք պաշտոնապես հանդես կգանք այդ դիրքորոշմամբ։ Մենք ունենք շատ պարզ հարց․ Ռուսաստանն իրավունք ունի՞ մնալ ՄԱԿ-ի ԱԽ մշտական անդամ և ընդհանրապես լինել ՄԱԿ-ում։ Մենք ունենք համոզիչ և հիմնավորված պատասխան՝ ո՛չ, այդպես չէ»,- ընդգծել է Կուլեբան։
Նրա խոսքով՝ հարցը, թե ինչ կլինի Ռուսաստանի հետ «Ուկրաինայի դեմ պատերազմում պարտությունից հետո», մասնավորապես, նրա ապամիջուկայնացման խնդիրը, դադարել է տաբու լինել արևմտյան դիվանագիտության համար։
«Այդ հարցերը դեռ չեն քննարկվում պետությունների և կառավարությունների ղեկավարների մամուլի ասուլիսներում ու հրապարակային հայտարարություններում, այլ քննարկվում են ավելի ցածր մակարդակով։ Նրանք արդեն հարցնում են, թե ինչպիսին պետք է դառնա Ռուսաստանը, որպեսզի վտանգ չստեղծի խաղաղության և անվտանգության համար»,- ասել է Կուլեբան։
Հավելենք, որ ավելի վաղ Սպիտակ տունը հայտնել էր, որ կցանկանար հասնել ՄԱԿ-ի Անվտանգության խորհրդի մշտական անդամների կազմից Ռուսաստանի հեռացմանը, սակայն այժմ նման հնարավորություն չի տեսնում, հետևաբար Վաշինգտոնը կշարունակի միջազգային հարթակներում ձգտել Մոսկվայի մեկուսացմանը։
Էմմա Չոբանյան
