Անիում նոր ընտրություններ կհայտարարվեն․ քաղաքական ուժերն այդպես էլ կոալիցիա չկազմեցին

Շիրակի մարզի Անի խոշորացված համայնքում տեղի կունենան նոր ընտրություններ, սակայն մինչև այդ վարչապետի որոշմամբ կնշանակվի համայնքապետի ժամանակավոր պաշտոնակատար։

մարզպետարանի տեղական ինքնակառավարման և հանրապետական գործադիր մարմինների հարցերով վարչությունից տեղեկացանք, որ Շիրակի մարզպետարանից ՀՀ կառավարություն գրություն է հղվել՝ Անիում ավագանու լիազորությունները դադարեցնելու, համայնքապետի ժ/պ նշանակելու ու նոր ընտրություններ հայտարարելու մասին։

Ընտրություններն ամենայն հավանականությամբ կնշանակվեն մարտի 26-ին։
Այս պահին համայնքապետի պարտականությունները կատարում է Անիի նախկին փոխհամայնքապետ Մարտիրոս Դարբինյանը։

Նոյեմբերի 25-ը Անիի ՏԻՄ ընտրություններին մասնակցած երեք քաղաքական ուժերի համար նիստ հրավիրելու ու տեղական իշխանություն ձևավորելու վերջնաժամկետն էր, սակայն վերջիններս կոալիցիոն իշխանություն ձևավորելու շուրջ այդպես էլ համաձայնության չեկան։ Այս ընթացքում թե՛ 3 մանդատ ունեցող նորաստեղծ «Հայկական երազանք» կուսակցությունը, և թե՛ 8 մանդատ ստացած «Քաղաքացիական պայմանագիր» կուսակցությունը բոյկոտեցին ավագանու նիստերը։

Ավագանու նսիտերի միակ մասնակիցը ընտրություններում ամենաշատ ձայներ հավաքած «Ազգ-համայնք» դաշինքի ներկայացուցիչներն էին։ Այս քաղաքական ուժը ստացել էր 10 մանդատ, սակայն չկարողացավ միանձնյա իշխանություն ձևավորել, քանի որ չէր ստացել ձայների կեսից ավելին։ Հիշեցնենք, որ այն գլխավորում էր 18 տարվա ՀՀԿ-ական համայնքապետ Արտակ Գևորգյանը։

Արմիկ Մովսիսյան