Քաղաքականություն
23.11.2022 | 17:35
Եվրախորհրդարանը ձայների մեծամասնությամբ ընդունել է Ռուսաստանի Դաշնությունն ահաբեկչությունը հովանավորող պետություն ճանաչելու մասին բանաձևը։ Քվեարկությունը տեղի է ունեցել նոյեմբերի 23-ին Ստրասբուրգում՝ Եվրախորհրդարանի լիագումար նիստի ժամանակ, հայտնում է Korrespondent-ը։
Փաստաթղթին կողմ է քվեարկել 494 պատգամավոր, դեմ՝ 58-ը, ձեռնպահ են մնացել 44 եվրոպացի քաղաքական գործիչներ։
Ռուսաստանն ահաբեկչության պետական հովանավոր ճանաչելու մասին բանաձևի հիմնական դրույթները նախօրեին համաձայնեցվել են Եվրախորհրդարանի քաղաքական խմբերի առաջնորդների մակարդակով։
«Եվրախորհրդարանը խստորեն դատապարտում է ռազմական հանցագործությունները և ահաբեկչական գործողությունները խաղաղ բնակչության դեմ, որոնք իրականացվել են Ռուսաստանի Դաշնության և նրա կամակատարների կողմից՝ Ուկրաինայում և այլ երկրների տարածքում կործանարար քաղաքական նպատակներին հասնելու նպատակով, և ճանաչում է Ռուսաստանը որպես պետություն, որը հովանավորում է ահաբեկչությունը, և որն օգտագործում է ահաբեկչական ռեսուրսները»,- ասվում է փաստաթղթում։
Տաթև Ֆռանգյան
