13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Սաուդյան Արաբիան մոտ է Թուրքիայում 5 մլրդ դոլարի դեպոզիտ ներդնելուն
Քաղաքականություն
23.11.2022 | 22:59
Սաուդյան Արաբիան և Թուրքիան քննարկում են թուրքական Կենտրոնական բանկում 5 մլրդ դոլարի չափով դեպոզիտի ներդրման հարցը։ Այս մասին հայտարարել է Սաուդյան Արաբիայի Ֆինանսների նախարարության խոսնակը, գրում է Reuters-ը, որին վկայակոչում է Duvar-ը։
«Մենք վերջնական քննարկման փուլում ենք (Թուրքիայի Կենտրոնական բանկում 5 միլիարդ դոլարի ավանդ) ներդնելու հարցով»,- ասել է խոսնակը՝ գրավոր պատասխանելով Reuters-ի հարցին:
Թուրքիայի Կենտրոնական բանկը հրաժարվել է մեկնաբանություն տալ հարցի շուրջ։ Իրավիճակին տեղյակ թուրք պաշտոնյան էլ ասել է, որ քննարկումները Սաուդյան Արաբիայի հետ գտնվում են վերջնական փուլում՝ փոխանակման կամ ավանդի համաձայնագրի շուրջ:
Հավելենք, որ Թուրքիայում տնտեսական ճգնաժամ է, իսկ գնաճը հասել է վերջին 24 տարվա առավելագույնին՝ շուրջ 85 տոկոսի։
Թուրքիայի Կենտրոնական բանկը տեղական արժույթով սվոպ գործարքներ է կնքել իր մի քանի գործընկերների հետ՝ ընդհանուր 28 միլիարդ դոլար արժողությամբ: Չինաստանի հետ պայմանագիր է կնքվել 6 միլիարդ դոլարի, Կատարի հետ՝ 15 միլիարդ դոլարի, Արաբական Միացյալ Էմիրությունների հետ՝ շուրջ 5 միլիարդ դոլարի չափով:
Էմմա Չոբանյան
