07.06.2026 | 13:37
Ժամը 11:00-ի դրությամբ՝ քվեարկության ակտիվությունն ամենաբարձրն է վերջին 10 տարում
Ինդոնեզիայում բացվել է G20-ի գագաթնաժողովը
Քաղաքականություն
15.11.2022 | 11:27
Ինդոնեզիայի նախագահ Ջոկո Վիդոդոն երեքշաբթի բացել է G20-ի գագաթնաժողովը։ Նա բացման խոսքում համաշխարհային առաջնորդներին կոչ է արել դադարեցնել Ուկրաինայում պատերազմը: «Եթե պատերազմը չավարտվի, մեզ համար դժվար կլինի առաջ գնալ, աշխարհը չպե՛տք է մասերի բաժանենք»,- հայտարարել է նա։ Ուկրաինայի ղեկավար Վլադիմիր Զելենսկին ևս, տեսաուղերձով դիմելով արդյունաբերական զարգացած երկրների առաջնորդներին, կոչ է արել դադարեցնել Ռուսաստանի կողմից Ուկրաինայում մղվող պատերազմը, փոխանցում է BBC-ի ռուսական ծառայությունը։
«Համոզված եմ, որ այժմ ժամանակն է, երբ ռուսական ավերիչ պատերազմը պետք է և կարելի է դադարեցնել։ Դա հազարավոր կյանքեր կփրկի», – ասել է Զելենսկին իր տեսաուղերձում։ Նա նաև կոչ է արել ապահովել «Զապորոժիե» ԱԷԿ-ում միջուկային անվտանգությունը և սահմանել ռուսական էներգակիրների գնային սահմանափակում։ Զելենսկին ընդգծել է, որ պատերազմը դադարեցնելու համատեքստում Ռուսաստանը պետք է դուրս բերի իր զորքերը, փոխհատուցի Ուկրաինային պատճառված վնասը և ընդունի Ուկրաինայի տարածքային ամբողջականությունը։
Ուկրաինայի նախագահը նաև խոսել է ուկրաինական հացահատիկի արտահանման վերաբերյալ հուլիսին ՄԱԿ-ի և Ռուսաստանի միջև կնքված գործարքի երկարաձգման անհրաժեշտությունից։ ՄԱԿ-ը հայտնել է, որ 10 միլիոն տոննա ուկրաինական հացահատիկ և այլ գյուղատնտեսական ապրանքներ հաջողությամբ արտահանվել են գործարքի մեկնարկից ի վեր՝ օգնելով կանխել համաշխարհային պարենային ճգնաժամը: Գործարքի ժամկետը լրանում է նոյեմբերի 19-ին։
