31.10.2026 | 15:35
Առաջիկա օրերին հանրապետության առանձին շրջաններում անձրև կտեղա
Սրբուհի Գալյանը կմեկնի ԱՄՆ. որքանով այցը կապ ունի նախկին պաշտոնյաների՝ ապօրինի ծագում ունեցող գույքի բռնագանձման հետ
Հասարակություն
27.10.2022 | 16:16
«Հանուն հանրապետության» կուսակցության ղեկավար, ԱԺ նախկին պատգամավոր Արման Բաբաջանյանը ֆեյսբուքյան իր էջում հայտնել է, որ առաջիկայում աշխատանքային այցով ԱՄՆ է մեկնելու ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալ Սրբուհի Գալյանը։ Ըստ Բաբաջանյանի՝ այցը հատկապես կարևոր է Հայաստանից ԱՄՆ դուրս բերված ապօրինի կապիտալը ԱՄՆ իշխանությունների հետ գնահատելու և ապօրինի ծագում ունեցող հայաստանյան գույքի մեջ ներառելու հնարավորությունների տեսանկյունից։
Factor.am-ը տեղեկությունը փորձեց ճշտել Գլխավոր դատախազությունից։ Վարդապետյանի խորհրդական Լուսինե Մարտիրոսյանը հաստատեց, որ Գալյանն առաջիկայում Միացյալ նահանգներ է մեկնելու, սակայն օրակարգի և հանդիպումների մասին որևէ մանրամասն չհայտնեց։
Հիշեցնենք՝ երեկ էլ Արման Բաբաջանյանը փաստաթուղթ էր հրապարակել, տեղեկացնելով, որ Պաշտպանության նախկին նախարար Վիգեն Սարգսյանը և նրա կինը՝ Լուսինե Գալաջյանն այս տարվա մայիսին ԱՄՆ-ի Մասաչուսեթս նահանգի Բելմոնտ քաղաքում ձեռք են բերել առանձնատուն 2 մլն 50 հազար դոլարով։ Նախկին պատգամավորը Factor.am-ի հետ զրույցում պատմել էր, որ փաստաթղթերն իր հետ Հայաստան է բերել ԱՄՆ-ից, սակայն թե որն է ինֆորմացիայի աղբյուրը և ինչ այլ տեղեկություններ կան, «Հանուն Հանրապետության» կուսակցության ղեկավարը զերծ էր մնացել բացահայտումներից, պատճառաբանելով՝ սպասում է իրավապահ մարմինների արձագանքին։
Ավելի ուշ Լուսինե Մարտիրոսյանը Factor.am-ի հետ զրույցում տեղեկացրել էր, որ Դատախազությունն ուսումնասիրություն է սկսել։ Հարցին՝ կարո՞ղ է արդյոք սա հիմք դառնալ, որ Վիգեն Սարգսյանը ևս անցնի ապօրինի ծագման գույքի բռնագանձման գործով, Մարտիրոսյանը նշել էր՝ այդ մասին վաղ է խոսել։
Ռոզա Վարդանյան
