31.10.2026 | 22:55
Հայտնաբերվել է զինծառայողի դի. ՊՆ
Ադրբեջանում ընդդիմության հանրահավաքին ընդառաջ ձերբակալություններ են
Քաղաքականություն
24.10.2022 | 15:24
Բաքվի քաղաքապետարանի դիմաց այսօր տեղական ժամանակով 16։00-ին ընդդիմադիր «Ժողովրդական ճակատ» կուսակցության կողմից նախատեսված բողոքի ցույցի նախաշեմին ոստիկանությունը սկսել է բերման ենթարկել ակտիվիստներին, ակցիայի կազմակերպիչներին, ինչպես նաև այլ ընդդիմադիր կուսակցությունների ներկայացուցիչների։
Տեղական լրատվամիջոցների հաղորդմամբ, մասնավորապես, Ադրբեջանի «Ժողովրդավարություն և բարեկեցություն» կուսակցության Սուրախանի շրջանային կազմակերպության անդամ Էնվեր Աղամալիզադեն բերման է ենթարկվել տանից դուրս գալիս։ Նշվում է, որ նրան ձերբակալել են՝ խոչընդոտելու հանրահավաքին մասնակցությունը։
Կուսակցության նախագահ Գուբադ Իբադօղլուն պահանջել է անհապաղ ազատ արձակել Աղամալիզադեին։
Հավելենք, որ իշխանությունները, ինչպես սովորաբար, չեն արտոնել այս հանրահավաքը, որի ընթացքում ընդդիմությունը պահանջելու է ժողովրդավարական բարեփոխումներ, հավաքների ազատություն, քաղբանտարկյալների ազատ արձակում, ազատ ընտրություններ, հիմնարար բարեփոխումներ և ցամաքային սահմանների բացում։
Հիշեցնենք, որ սեպտեմբերի 30-ին էլ ադրբեջանական ընդդիմությունը փորձել էր Միլլի Մեջլիսի մոտ հանրահավաք անցկացնել, սակայն ոստիկանությունը ուժով ցրել էր այն՝ ձերբակալելով մասնակիցներին։
Էմմա Չոբանյան
