Միավորե՞լ բուհերը․ թեժ բանավեճ՝ ԿԳՄՍՆ-ի, Բրյուսովի, Ֆիզկուլտինստիտուտի, ՀՊՄՀ-ի ներկայացուցիչների մասնակցությամբ․ ՏԵՍԱՆՅՈՒԹ

Հայաստանի Կառավարությունը պատրաստվում է գնալ բուհերի միավորման՝ Վ․Բրյուսովի անվան պետական համալսարանը միավորել Ֆիզիկական կուլտուրայի և սպորտի պետական ինստիտուտի ու Խ․Աբովյանի անվան Հայաստանի պետական մանկավարժական համալսարանի հետ։ Ըստ գաղափարի՝ վերակազմակերպման արդյունքում կհիմնվի Խաչատուր Աբովյանի անվան կրթական գիտությունների ինստիտուտ: Այսինքն՝ այս երեք բուհի միավորման արդյունքում կհիմնվի մեկ՝ մանկավարժական ուղղվածությամբ համալսարան։

Նախագիծը շրջանառվում է պետական գերատեսչություններում։ Բուհերի միավորման նպատակներից է հայտարարվում կոնկրետ ուղղվածություններով բուհեր ունենալը, կրթության որակի բարձրացումը։ Վարչապետ Նիկոլ Փաշինյանը հայտարարել է Կառավարության նպատակադրման մասին՝ ՀՀ-ում ունենալ 8 պետական բուհ, որոնք առաջիկայում պետք է տեղակայվեն Աշտարակում հիմնվելիք ակադեմիական քաղաքում։ Այս փոփոխությունը նախատեսված է Կրթության մինչև 2030 թվականի զարգացման պետական ծրագրով, որն առաջին ընթերցմամբ արդեն ընդունվել է Ազգային Ժողովում, երկրորդ ընթերցումը դեռ սպասվում է։

Հայաստանի բարձրագույն կրթության համակարգը կանգնած է աղետի առաջ, իրավիճակը կշտկվի վճռական քայլերի դեպքում՝ սեպտեմբերի 1-ի առիթով ուղերձում հայտարարել էր վարչապետ Նիկոլ Փաշինյանը։ Նա հղում էր արել ընդունելության քննության արդյունքներին՝ նշելով, որ բարեփոխումներն անհետաձգելի են․ պետական և մասնավոր բուհական ընդունելության տեղերի 60 տոկոսը թափուր է մնացել։

Բուհերի միավորման՝ Կառավարության նախաձեռնությունը մտահոգություններ և որոշակի դիմադրություն է առաջացրել նաև մասնագիտական, համալսարանական համայնքում։ Բանը հասավ բողոքի ակցիաների Կառավարության շենքի մոտ։

Արդյո՞ք բուհերի միավորումը բերելու է բարձրագույն կրթության որակի բարձրացման և ի՞նչ տեսակետ ունեն այն բուհերը, որոնց վերաբերում է այս նախագիծը։ Factor TV-ի տաղավարում հրավիրված բանավեճին մասնակցում են Ֆիզիկական կուլտուրայի հայկական պետական ինստիտուտի ռեկտոր Դավիթ Խիթարյանը, Բրյուսովի անվան լեզվագիտական համալսարանի Սոցիալական գիտությունների և սերվիսի ֆակուլտետի դեկան Ցոլակ Ակոպյանը, Մանկավարժական համալսարանի Պատմության և հասարակագիտության ֆակուլտետի դեկան Էդգար Հովհաննիսյանը, ԿԳՄՍՆ Բարձրագույն և հետբուհական մասնագիտական կրթության վարչության պետ Լուսինե Գրիգորյանը, ԱԺ ՔՊ խմբակցության պատգամավոր Թագուհի Ղազարյանը, Բաց հասարակության հիմնադրամներ-Հայաստանի ծրագրերի գծով փոխտնօրեն Դավիթ Ամիրյանը։