18.08.2026 | 18:33
Ժամանակավորապես փակ կլինի Ներքին Չարբախից դեպի Դարակերտ բնակավայր տանող ճանապարհահատվածը
Ադրբեջանի ԱԳՆ-ն նյարդային է արձագանքել ԵԱՀԿ առաքելության Հայաստան այցին՝ հրաժարվելով ճանաչել այն
Քաղաքականություն
20.10.2022 | 17:13
Ադրբեջանի ԱԳՆ-ն արձագանքել է ԵԱՀԿ առաքելության՝ Հայաստան կատարելիք այցին և իր դժոգոհությունը հայտնել։ Մասնավորապես, Ադրբեջանի ԱԳՆ-ն հայտնել է, որ այդ հարցը, իբր, ԵԱՀԿ որևէ հավաքական մարմնում չի քննարկվել և այդ առումով որոշում չի կայացվել։
««Հայաստանի կարիքները գնահատող ԵԱՀԿ առաքելություն» կոչվող ցանկացած խումբ չունի ԵԱՀԿ մանդատ, որևէ կերպ չի կարող ասոցացվել ԵԱՀԿ-ի հետ, և նրա ոչ մի արդյունք կամ զեկույց չի ընդունվի որպես ԵԱՀԿ փաստաթուղթ»,- ասվում է հայտարարության մեջ։
Ըստ Բաքվի՝ սա միակողմանի նախաձեռնություն է Հայաստանի կողմից և ոչ այլ ինչ է, քան մի խումբ մասնակից պետությունների անձնական այց, և նման այցի ցանկացած արդյունք կգնահատվի համապատասխանաբար։
Ադրբեջանի ԱԳՆ-ն դժգոհել է, որ նախկինում, իբր, դիմել է կազմակերպությանը, սակայն մերժում է ստացել՝ կոնսենսուսի բացակայության պատճառով։
«ԵԱՀԿ նախագահության և քարտուղարության նման միակողմանի գործողությունները, ի թիվս այլ բաների, հակասում են ցանկացած պատասխանատու և վստահելի միջնորդության ու վստահության ամրապնդման հիմնական սկզբունքներին, որոնք պահանջում են կողմերի համաձայնությունը, միջնորդների անաչառությունը և պետությունների պարտավորությունների կատարումը, որոնք բխում են միջազգային իրավունքից»,- ասվում է հայտարարության մեջ։
Ըստ երևույթին՝ Բաքուն մոռանում է, որ ՀՀ-ն իր սեփական տարածքում կարող է հրավիրել ցանկացած առաքելություն, որի համար երրորդ կողմի համաձայնության անհրաժեշտություն չկա։
Հավելենք, որ Հայաստանի կառավարության հրավերով ԵԱՀԿ-ն հոկտեմբերի 21-27-ը երկիր կուղարկի կարիքների գնահատման թիմ։ Այցի նպատակն է՝ գնահատել իրավիճակը որոշ սահմանամերձ շրջաններում ԵԱՀԿ մանդատի և փորձի համաձայն և նրա անվտանգության համալիր հայեցակարգի շրջանակում։
Էմմա Չոբանյան
