14.12.2025 | 19:26
Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին
«Ադրբեջանցիները հույս ունեն վերահսկել Երևան-Գորիս մայրուղին»․ Սերգեյ Բագրատյան. ՏԵՍԱՆՅՈՒԹ
Քաղաքականություն
31.05.2018 | 21:19
Վայոց ձորի նախկին մարզպետ, ծառուկյանական պատգամավոր Սերգեյ Բագրատյանը հաստատում է, որ Արենի գյուղի մերձակա հայ-նախիջևանյան սահմանում ադրբեջանցի զինվորականները դիրքային առաջխաղացում են արձանագրել։ «Բավականին տեղաշարժել են իրենց հենակետերը, որի իրավունքը ունեին»,- ասում է նա։
Պարոն Բագրատյանը նախորդ շաբաթ-կիրակի եղել է Արենի գյուղում և նույնիսկ հեռադիտակով ծանոթացել է ադրբեջանցի զինվորականների նոր դիրքավորումներին։ Տեղյակ է, որ այդ ամբողջը տեղի է ունեցել առանց մեկ կրակոցի։ «Իրենց առաջխաղացումը տեղի է ունեցել այն պարզ պատճառով, որ իրենք համարում են, որ իրենց տարածքում իրենք իրավունք ունեն տեղաշարժվել»,- մեկնաբանում է վայոցձորցի Սերգեյ Բագրատյանը։
Այսօր մեր և ադրբեջանցի զինվորականների միջանկյալ գոտին 800 մետր է։ Սերգեյ Բագրատյանը տեղացիներին բացատրել է, որ խուճապի կարիք չկա և ամեն ինչ վերահսկվում է։
«Ենթադրում եմ, որ կա որոշակի շարժեր երկու կողմից էլ՝ միգուցե պայմանավորված կամ չպայմանավորված։ Բայց հենակետերի առաջխաղացում մենք ունեցել ենք այլ տարածքում»,- նկատում է նա։
Պատգամավորը, սակայն, մտավախություններ ունի ադրբեջանցիների արածի կապակցությամբ, թեպետ այնպես չէ, որ դիրքային առաջխաղացումով հայկական Արենի գյուղը հայտնվում է ադրբեջանցիների նշանառության տակ։ Այգիների մի հատված, այո՛, այլևս մշակել չի լինի։ «Ավելի շատ ինձ մտահոգեց, որ իրենց աղբյուրները նշել են, որ իրենց համար սա կարևոր է ճանապարհի իմաստով՝ այս Երևան-Գորիս ճանապարհի իմաստով, այսինքն՝ հույս ունենալ, որ այս հենակետերը կարող են հետագայում օգտագործել խանգարելու մեր զորքերի տեղաշարժը»,- վերլուծում է պարոն Բագրատյանը։
Հայաստանի փոխարտգործնախարար Արմեն Պապիկյանը հայ-նախիջևանյան սահմանում ադրբեջանական դիրքերի առաջխաղացումը չի տարանջատում ղարաբաղյան խնդրից՝ Ադրբեջանն ամեն կերպ փորձում է տապալել Մինսկի խմբի գործընթացը։ Միաժամանակ պարոն Պապիկյանը հայտարարում է, որ ինքը ոչ մի տեղեկություն չունի ադրբեջանական դիրքերի առաջխաղացումից: «Չստուգված տեղեկության տարածումը որևէ դրական հետևանք չի կարող ունենալ»,- արձանագրում է պարոն փոխարտգործնախարարը։
Ի դեպ, պարոն Պապիկյանը որևէ կերպ չփորձեց մեկնաբանել հայ-նախիջևանյան դիրքերի փոփոխությունը սեփական աչքերով տեսած Սերգեյ Բագրատյանի վկայությունները:
Մհեր Արշակյան
