31.10.2026 | 22:55
Հայտնաբերվել է զինծառայողի դի. ՊՆ
Դատավոր Արուսյակ Ալեքսանյանը կկալանավորվի
Հասարակություն
19.10.2022 | 12:34
Երևան քաղաքի ընդհանուր իրավասության դատարանը քիչ առաջ բավարարեց դատավոր Արուսյակ Ալեքսանյանին կալանավորելու վերաբերյալ Ազգային անվտանգության ծառայության միջնորդությունը։
Այս մասին Factor.am-ի հետ զրույցում ասաց Ալեքսանյանի պաշտպան Երեմ Սարգսյանը։ Նշենք, որ Արուսյակ Ալեքսանյանին կալանավորելու միջնորդությունը քննում էր Երևանի ընդհանուր իրավասության դատարանի Աջափնյակ 1 նստավայրի դատավոր Ռազմիկ Մարիկյանը։
Դատավոր Ալեքսանյանը մեղադրվում է պաշտոնեական լիազորություններն անցնելու և ակնհայտ անարդար դատական ակտ կայացնելու մեջ։ Վերջինս որոշել է գրավի դիմաց ազատ արձակել քրեական հեղինակություն համարվող Սերգեյ Գրիգորյանին, որը հայտնի է Ֆազ մականունով և փաստաբան Էրիկ Ալեքսանյանի պաշտպանյալն է: Խոսքը 2․5 մլն դրամ գրավի մասին է։
Դատավոր Արուսյակ Ալեքսանյանի այս որոշումը Վերաքննիչ քրեական դատարանը բեկանել է, որից հետո ԱԱԾ-ն սկսել է Ալեքսանյանի նկատմամբ այս քրեական հետապնդումը։
Նույն գործով մեղադրվում է նաև փաստաբան Էրիկ Ալեքսանյանը։ Վերջինս, ըստ մեղադրանքի, օժանդակել է դատավորին՝ պաշտոնեական լիազորություններն անցնելու հարցում։ Փաստաբանի պաշտպանների պնդմամբ՝ Էրիկ Ալեքսանյանն ընդամենը կատարել է իր մասնագիտական պարտականությունն ու միջնորդություն ներկայացրել դատարան։ Էրիկ Ալեքսանյանին կալանավորելու միջնորդությունը քննած դատավորը դեռևս որոշում չի հրապարակել։
Արաքս Մամուլյան
