30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ադրբեջանի ԱԳՆ նյարդային պատասխանը Նիկոլ Փաշինյանին
Քաղաքականություն
17.10.2022 | 14:36
Ադրբեջանի ԱԳՆ-ն արձագանքել է ՀՀ վարչապետ Նիկոլ Փաշինյանի թվիթերյան գրառմանը, որում Փաշինյանն անդրադարձել է տարածաշրջանում հաղորդակցությունների բացման թեմային։
«Հայաստանը պետք է հրաժարվի կեղծ պատրվակներից՝ խուսափելու համար 2020 թվականի նոյեմբերի եռակողմ հայտարարությամբ ստանձնած իր պարտավորություններից «Զանգեզուրի միջանցքով» ավտոմոբիլային ու երկաթուղային ճանապարհները միացնելու վերաբերյալ։ Անցակետերի 3 անիրատեսական տարբերակներ առաջարկելը՝ անտեսելով 20 ամիս տևած բանակցությունները, այնքան էլ լավ քաղաքականություն չէ»,- ասվում է Ադրբեջանի ԱԳՆ թվիթերյան գրառման մեջ։
Ուշագրավ է, որ Բաքուն, անտեսելով 20 ամիս տևած բանակցությունների բովանդակությունը, շարունակում է խոսել գոյություն չունեցող ինչ-որ միջանցքի մասին, որի վերաբերյալ հիշատակում չկա որևէ փաստաթղթում, այդ թվում՝ ադրբեջանական ԱԳՆ-ի կողմից նշված 2020 թվականի նոյեմբերի 9-ի եռակողմ հայտարարության մեջ։ Այս փաստաթղթում, ի դեպ, որևէ երթուղի նշված չէ, այնպես որ՝ Հայաստանն ինքն է որոշում սեփական տարածքում որտեղ անցակետ բացել կամ չբացել։
Հիշեցնենք, որ վարչապետ Նիկոլ Փաշինյանը թվիթերյան իր միկրոբլոգում այսօր անդրադարձել էր տարածաշրջանում հաղորդակցությունների բացման թեմային։
«Հայաստանի կառավարության որոշման նախագիծը՝ բացելու երեք անցակետ Հայաստան-Ադրբեջան սահմանին և ապահովելու արևելյան Ադրբեջանի ու Նախիջևանի միջև կապը, մի քանի ամիս է՝ պաշտոնապես շրջանառվում է։ Հայաստանի կառավարությունը սպասում է Ադրբեջանից դրական արձագանքի»,- գրել էր Նիկոլ Փաշինյանը։
Էմմա Չոբանյան
