07.10.2026 | 11:12
«Արմավիր» ՔԿՀ-ում դրոնով 6 բջջային հեռախոս է փորձ արվել փոխանցել
52 մլն դրամ՝ Գյումրիում Երևանի օրեր կազմակերպելու համար․ գնումները կատարվել են մեկ անձից
Քաղաքականություն
16.10.2022 | 10:37
«Երևանի օրերը Գյումրիում» ծրագիրն արժեցել է 52 մլն 721 հազար դրամ։ Այս մասին Factor.am-ի գրավոր հարցմանն ի պատասխան հայտնում են Երևանի քաղաքապետարանից։ Գերատեսչության փոխանցմամբ՝ միջոցառումները կազմակերպվել են մեկ անձից կատարվող գնման ընթացակարգով։
49 մլն դրամի պայմանագիր է կնքվել «Արվեստ23» ՀԿ-ի հետ, որի շրջանակներում կազմակերպվել է Հայաստանի պետական սիմֆոնիկ նվագախմբի և «Ռեինկարնացիա» խմբի համերգը։ Ըստ գնումների պետական համակարգի՝ «Արվեստ23» ՀԿ-ի կողմից սա միակ և այն էլ բազմամիլիոնանոց ծառայությունների մատուցումն է։
1 մլն 600 հազար դրամի պայմանագիր էլ կնքվել է «Ս. Սարգսյանի անվան համազգային պետական թատրոն» ՊՈԱԿ-ի հետ, որը ցուցադրել է «…Եվ նորից գարուն» ներկայացումը։
1 մլն 100 հազար դրամի շրջանակներում «Շշուկ» ՍՊԸ-ն կազմակերպել է «Art and Crafts souvenirs» ցուցահանդեսը՝ տաղավարներ տրամադրելով հուշանվերների վաճառքով զբաղվող անհատներին ու կազմակերպություններին։ Այս ընկերությունը պետական կառույցներին ծառայություններ է մատակարարում դեռ 2016 թվականից, այդ թվում՝ ոչ միայն Երևանի քաղաքապետարանին, այլև Հանրային հեռուստաընկերությանը, ԱԳ, Էկոնոմիկայի և Սփյուռքի նախարարություններին։ Չնայած ընկերության սեփականատերը ՍԴ աշխատակազմի նախկին ղեկավար Առուշան Հակոբյանն է, սակայն, նրա պաշտոնավարման տարիներին իր իսկ ընկերությունը մեկ անձից գնման ընթացակարգով ծառայություններ է մատացուել նաև Բարձր դատարանին։ Առուշանյանն ավելի վաղ «Հետք»-ին պարզաբանել էր, որ շահերի բախում չի տեսնում, քանի որ ինքը սեփականատերն է, բայց ոչ գործադիր տնօրենը։
300 հազար դրամով էլ «Հ. Թումանյանի անվան պետական տիկնիկային թատրոն» ՊՈԱԿ-ը Գյումրիում «Կոկորդիլոսը» ներկայացումն է ցուցադրել։
Չորս ընկերությունների հետ պայմանագրերը կնքվել են 2022 թվականի հուլիսի 20-ին, իսկ միջոցառումները տեղի են ունեցել սեպտեմբերի 2-3-ին։
Նարեկ Կիրակոսյան
