07.10.2026 | 10:00
Ազգային ժողովի նիստը՝ ՈՒՂԻՂ
Երևան է ժամանում ԵՄ դիտորդների առաջին խումբը. Տոյվո Կլաարը լուսանկար է հրապարակել
Քաղաքականություն
14.10.2022 | 09:55
Այսօր Երևան է ժամանում ԵՄ դիտորդների առաջին խումբը. այս մասին թվիթերի իր միկրոբլոգում գրառում է արել Հարավային Կովկասի հարցերով ԵՄ ներկայացուցիչ Տոյվո Կլաարը և լուսանկար հրապարակել։
«Այսօր ԵՄ դիտորդների առաջին խումբը ժամանում է Երևան։ Անդամ 27 երկրներն արագ են գործել՝ Հայաստանի Հանրապետության հարցմանը արձագանքելու համար։ ԵՄ դիտորդական առաքելության տեղակայման նպատակն է լինելու վերահսկել իրավիճակը և աջակցել տեղում Հայաստան-Ադրբեջան սահմանային իրավիճակի կայունացմանը»,- գրել է Կլաարը։
Հիշեցնենք` սահմանին դիտորդական առաքելություն տեղակայելու մասին համաձայնությունը ձեռք էր բերվել ՀՀ վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի՝ հոկտեմբերի 6-ին Պրահայում կայացած քառակողմ հանդիպման ժամանակ։ Հանդիպումից հետո տարածված հայտարարությունում ասվում է, որ Հայաստանն իր համաձայնությունն է տվել Ադրբեջանի հետ սահմանի երկայնքով ԵՄ քաղաքացիական առաքելության աշխատանքին, իսկ Ադրբեջանը համաձայնել է համագործակցել նշյալ առաքելության հետ այնքանով, որքանով առնչություն կունենա: Առաքելությունը կարճաժամկետ է և կտևի առավելագույնը երկու ամիս: Նպատակը կլինի վստահության կառուցումը և զեկույցների միջոցով սահմանային հանձնաժողովներին աջակցելը:
