04.11.2026 | 20:29
Վարչապետն ընդունել է ՀՀ պետական մրցանակակիր Քեմ Ղաֆֆարիանին
Վրաստանը հերթական անգամ Բաքվի և Երևանի միջև բանակցությունների հարթակ է առաջարկել
Քաղաքականություն
20.09.2022 | 17:05
Վրաստանը նախկինի նման պատրաստ է որպես միջնորդ հանդես գալ Հայաստանի և Ադրբեջանի միջև հակամարտությունը լուծելու համար, որոնց սահմաններին անցյալ շաբաթ իրավիճակը սրվել էր։ Այս մասին հայտարարել է Վրաստանի արտգործնախարար Իլյա Դարչիաշվիլին՝ Թբիլիսին որպես բանակցությունների հարթակ առաջարկելով, գրում է ՏԱՍՍ-ը։
Դարչիաշվիլին Նյու Յորքում է վարչապետ Իրակլի Ղարիբաշվիլիի գլխավորած պաշտոնական պատվիրակության կազմում, որը նախատեսում է ելույթ ունենալ ՄԱԿ-ի Գլխավոր վեհաժողովի 77-րդ նստաշրջանի շրջանակում։
«Վրաստանը միշտ պատրաստ է եղել հարավային հարևաններին առաջարկել Թբիլիսին որպես վայր, որտեղ նրանք կկարողանային երկխոսություն սկսել խաղաղության ամրապնդման ուղղությամբ։ Այս առումով մեր երկրի առաջարկը կրկին ուժի մեջ է։ Եթե անհրաժեշտ լինի, որ մեր երկիրը ներգրավված լինի գործընթացում՝ որպես միջնորդ, մենք միշտ պատրաստ ենք»,- ասել է Դարչիաշվիլին։
Նա հավելել է, որ Վրաստանն այս առումով նախապայմաններ չունի։ Թբիլիսիի գլխավոր նպատակը տարածաշրջանում խաղաղությունն ու կայունությունն է։ Վրաց նախարարը հիշեցրել է, որ Ղարիբաշվիլիի ջանքերով 2021 թվականի հունիսին Ադրբեջանը Հայաստան է տեղափոխել 15 զինվորականի, իսկ Երևանը Բաքու է ուղարկել ականապատ դաշտերի քարտեզներ։ Վրաստանի միջնորդության մեկ այլ օրինակ էլ Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հանդիպումն է, որը տեղի է ունեցել հուլիսի 16-ին Թբիլիսիում։
Տաթև Ֆռանգյան
