03.04.2026 | 00:12
Վարդան Ղուկասյանի որդու խափանման միջոցը փոխվել է. նա տնային կալանքի տակ է
Բաքվի ռուսամետ գործողությունները կարող են հանգեցնել Արևմուտքի կողմից հակաադրբեջանական պատժամիջոցների․ ադրբեջանցի փորձագետ
Քաղաքականություն
12.09.2022 | 23:07
Բաքվում օրերս Ադրբեջանի, Իրանի և ՌԴ-ի ներկայացուցիչները ստորագրեցին «Հյուսիս-Հարավ» միջազգային տրանսպորտային միջանցքի զարգացման մասին հռչակագիրը։ Բացի այդ, նույն ժամանակահատվածում Բաքվում նաև ընթանում էր պաշտպանական ցուցահանդես, որում ամենամեծ ներկայացվածություն ուներ ռուսական «Ռոսօբորոնէքսպորտը»։ Ադրբեջանում որոշ շրջանակներ կարծում են, որ ՌԴ-ի և Իրանի հետ նման սերտ կապերը կարող են անտարբեր չթողնել Արևմուտքին ու հանգեցնել պատժամիջոցների։
Մասնավորապես, «Թուրան» գործակալության հետ զրույցում «Արևելք-Արևմուտք» վերլուծական կենտրոնի տնօրեն Արաստուն Օրուջլուն վերլուծել է ստեղծված իրավիճակը։
«Բաքվում զենքի ցուցահանդես անցկացնելը սովորական բան է, դրանք անցկացվում են շատ երկրներում։ Բայց փաստն այն է, որ Ռուսաստանի մասնակցությունը դրան կարող է միայն բացասական հետեւանքների հանգեցնել մեր երկրի համար»,- ասել է Օրուջլուն։
Ըստ նրա՝ վերջին ժամանակներում ԱՄՆ-ը բացասական է արձագանքում Ադրբեջանի քաղաքականությանը։ Մասնավորապես, պետքարտուղար Էնթոնի Բլինքենը նշանակել է Մինսկի խմբի համանախագահ, ֆինանսական օգնություն է հատկացրել Լեռնային Ղարաբաղի հայերին։ Դա, ըստ վերլուծաբանի, կարելի է հասկանալ որպես պատասխան Բաքվի ռուսամետ քաղաքականությանը։
«Ադրբեջանն իր արտաքին քաղաքականության մեջ, երբ աշխարհը պառակտվել է, միանշանակ առաջնահերթություն չի ցուցաբերում։ Վախից կամ Ռուսաստանից կախվածությունից պարզ չէ, որ Բաքուն փորձում է հավասարապես համագործակցել Արևմուտքի և Մոսկվայի հետ։ Բաքվում ռուսական զենքի ցուցադրությունը, նույն զենքերը, որոնք ցուցադրված են ռազմավարի պուրակում, չափազանց հիմար արարք է, որի պատասխանը մենք անպայման կտեսնենք»,- ասել է վերլուծաբանը։
Օրուջլուն նաև տարակուսանք է հայտնել ռուսական զենքեր ներկայացնող ցուցահանդեսի առնչությամբ․ «Աշխարհը տեսնում է, թե ինչ արժեք ունի ռուսական զենքն Ուկրաինայում։ Ռուսաստանին անկյուն են քշել, անգամ Չինաստանն է ենթարկվում Ռուսաստանի Դաշնության դեմ պատժամիջոցներին, և հանկարծ պարզվում է, որ Բաքվում Մոսկվան Ուկրաինայի դեմ կիրառվող զենք է ցուցադրում՝ ուղղաթիռներ, զրահամեքենաներ, հաուբիցներ։ Ինչի՞ մասին է մտածում Ադրբեջանի ղեկավարությունը»։
Փորձագետ նշում է, որ Ադրբեջանի իշխանությունների քաղաքականությունում հաճախ կան անբացատրելի գործողություններ․ Ադրբեջանն իրեն դրսևորում է որպես Ռուսաստանի և Բելառուսի դաշնակից, «մինչդեռ Ուկրաինան Արցախյան 44-օրյա պատերազմում միանշանակ աջակցել է Ադրբեջանին»։
Օրուջլուն կարծում է, որ պաշտոնական Բաքուն պետք է որոշում կայացնի. «Ադրբեջանի ղեկավարությունը չունի արտաքին քաղաքական դոկտրին, առաջնահերթություններ, լուրջ ռազմավարություն: Երկիրն արձագանքում է իրավիճակային փոփոխություններին՝ փորձելով ընկերանալ բոլորի հետ։ Միգուցե մենք մտածում ենք կրկնել Թուրքիայի քաղաքականությունը, որը զենքով աջակցում է Ուկրաինային և բազմիցս հայտարարում է Ռուսաստանի հետ ռազմավարական գործընկերության մասին՝ միաժամանակ հակադարձելով Մոսկվայի հակաուկրաինական հայտարարություններին։ Բայց Թուրքիան մեծ երկիր է, նա կարող է իրեն թույլ տալ այն, ինչ չի կարող իրեն թույլ տալ Ադրբեջանը»։
Փորձագետը նշել է, որ եթե Բաքուն չի կարող խանգարել նրան, որ Արցախի ԱԳ նախարար Դավիթ Բաբայանն այցելում է ԱՄՆ՝ հանդիպելու տեղի կոնգրեսականներին, դա մեսիջ է Ադրբեջանին ԱՄՆ-ից։
«Այստեղ կարելի է հիշել վերջերս Լոնդոնում մեր երկրի դեսպանատան գրավումը։ Բայց քանի որ Ադրբեջանի ղեկավարությունը չի հասկանում ակնարկները, ես չեմ բացառում, որ մի օր պատժամիջոցներ կիրառվեն»,- եզրափակել է Օրուջլուն։
Էմմա Չոբանյան
