Բյուրականի դպրոցի տնօրենը հաստատում է ձայնագրության իսկությունը, բայց պնդում է՝ ուսուցիչներին չի պարտադրել

«Ես ուսուցիչներին չեմ պարտադրել, ես ընդամենը տեղեկացրել եմ, որ մարզպետը գալիս է մեր գյուղ»,- Factor TV-ի հետ զրույցում Բյուրականի Հովհաննես Թումանյանի անվան միջնակարգ դպրոցի տնօրենի ժամանակավոր պաշտոնակատար Վարսենիկ Վարդանյանն այսպես մեկնաբանեց ձայնագրությունը, որում ինքը ուսուցիչներին կոչ է անում հավաքվել գյուղապետարանի մոտ՝ Արագածոտնի մարզպետին դիմավորելու համար։

Վարդանյանը պարզաբանեց, որ ուսուցիչները հարցեր ունեին մարզպետին․ «Իրենք հարցեր ունեին, տեղեկացրել եմ, որ մոտենան, իրենց հարցերը տան»։

Մեր հարցին, թե ինչու է ուսուցիչներին տեղեկացրել նաև համերգային ծրագրի և հյուրերի ներկայության մասին, տնօրենի պաշտոնակատարը կրկնեց, որ որևէ պարտադրանք չի եղել. «Ես նրանց չեմ պարտադրել, ասել եմ ընդամենը, որ կարող են ներկա գտնվել։ Ընդամենը տեղեկացրել եմ, ես նրանց չեմ պարտադրել»։

Հարցին՝ արդյոք Արագածոտնի մարզպետարանից իրեն հանձնարարել էին ուսուցիչներին տեղեկացնել մարզպետի այցի մասին, Վարդանյանմ արձագանքեց։

«Ո՛չ, չէին ասել։ Ընդամենը մեր ուսուցիչները հարցեր ունեին, ես տեղեկացրի, որ գան իրենց հարցերը տան մարզպետին։ Ի՞նչ խնդիր կա»,- վրդովված ասաց դպրոցի տնօրենի ժամանակավոր պաշտոնակատարը։

Հավելենք, որ տարածված ձայնագրության մեջ, մասնավորապես, ասվում է․

«Բարև ձեզ, հարգելի՛ ուսուցիչներ։ Հարգելի՛ ուսուցիչներ, վաղը՝ ժամը 11։40-ին, կխնդրեի, որ դուք բոլորով հավաքվեիք Բյուրականի գյուղապետարանի մոտ՝ ընդունելու մեր պարոն մարզպետին և իր թիմակիցներին։ Լինելու են նաև շատ հյուրեր, հարգելի ուսուցիչներ։ Խնդրում եմ, որ դուք նույնպես ներկա լինեք։ Լինելու է նաև համերգային ծրագիր»։

Ընդգծենք, որ Նիկոլ Փաշինյանը մայիսի 14-ին, անդրադառնալով Ապարանում աշխատանքային ժամին «Քաղաքացիական պայմանագիր» կուսակցության քարոզարշավին դպրոցի ուսուցիչների մասնակցությանը, նշել էր․

«Այն դպրոցները, որի հետ կապված խնդիր կա, դիմում են գրել աշխատանքից ազատման, բայց նաև, որպեսզի չստացվի, որ մենք պահի տակ, էմոցիայի տակ որևէ մեկի նկատմամբ անարդար վարվենք, մենք հիմա ծառայողական քննություն կիրականացնենք, և եթե պարզվի, որ ապօրինի հրահանգ է եղել, միանշանակ կազատվեն»,- ասել էր վարչապետը։

Մինչ այս պահը, սակայն, հրապարակային չի հայտարարվել ծառայողական քննության արդյունքների մասին։

Նիկոլ Փաշինյանը նույն ասուլիսի ընթացքում վստահեցրել էր նաև, որ ինքն «ատում է վարչական ռեսուրսը»։

«Ես ատում եմ վարչական ռեսուրսը և դա ճշմարտություն է, որովհետև այդ թվում այնտեղ, որտեղ կա նմանատիպ երևույթ, դա ինձ հնարավորություն չի տալիս քաղաքացիների հետ ավելի անմիջական շփվել և զգալ նրանց էմոցիաները։ Մարդիկ իրենց տներից իջնում են և խոսակցություններ են տեղի ունենում, որոնք ինձ այնքան են հուզում, որ ես նույնիսկ ելույթի ժամանակ չեմ կարողանում հուզմունքս զսպել»,- նշել էր վարչապետը։

Արփի Հակոբյան