08.06.2026 | 17:17
Արտաքին ճնշումները մեծ ազդեցություն ունեցան ընտրողների վրա․ Նիդերլանդների խորհրդարանի պատգամավոր․ ՏԵՍԱՆՅՈՒԹ
ՌԴ-ն խոստովանում է՝ Խարկովում իրավիճակը բարդ է․ Ուկրաինան նոր տարածքների ազատագրման մասին է հայտնում
Քաղաքականություն
09.09.2022 | 17:37
ՌԴ-ն հայտնում է Ուկրաինայի գրավյալ Խարկովի մարզում ստեղծված բարդ իրավիճակի մասին։ Ըստ այդ տեղեկությունների՝ մասնավորապես, Կուպյանսկի շրջանում իրավիճակը շարունակում է բարդ մնալ, սակայն ռուս զինվորականները վերահսկում են քաղաքը։ Այս մասին ասել է շրջանի ղեկավար Մաքսիմ Գուբինը, գրում է ՌԻԱ Նովոստին։
«Իրավիճակը Կուպյանսկի շրջանում այժմ բավականին բարդ է, ոչ միանշանակ. ուկրաինական ուժերն ակտիվորեն կռվում են Շևչենկովի շրջանում, առաջնագիծն այժմ գտնվում է հենց Շևչենկովի շրջանում: Բայց ռուսական զորքերը պահում են դիրքերը, քաղաքը բավականին ապահով վիճակում է»,- ասել է նա՝ միաժամանակ նշելով, որ քաղաքից բնակչության տարհանում է կազմակերպվում։
Ռուսական քարոզչական լրատվամիջոցները հայտնում են, որ Ռուսաստանն ակտիվորեն զրահատեխնիկա և անձնակազմ է տեղափոխում Խարկովի ուղղությամբ։ Համապատասխան տեսանյութերը հայտնվել են նաև սոցիալական ցանցերում։
Մինչ այդ, Ուկրաինայի ԶՈւ Գլխավոր շտաբից հայտնել են, որ երեք օրում Խարկովի մարզում հաջողվել է 50 կմ-ով առաջ շարժվել։ Ուկրաինացի զինվորականներն ազատագրել են մի շարք բնակավայրեր։
Պատերազմի ուսումնասիրության ամերիկյան կենտրոնն էլ կանխատեսում է, որ առաջիկա 72 ժամվա ընթացքում Խարկովի մարզում Ուկրաինան կկարողան ազատագրել նաև Կուպյանսկը։ Սրա հետ մեկտեղ, ռուսական զորքերը հայտարարել են Խարկովի մայրաքաղաքի ժամանակավոր տեղափոխման մասին։ Նախկինում նման կարգավիճակ ուներ հենց Կուպյանսկը։
Հավելենք, որ սա եզակի դեպքերից է, երբ ռուսական աղբյուրները հայտնում են Ուկրաինայում պատերազմի ընթացքում ռուսական կողմի խնդիրների և բարդ իրավիճակի մասին։
Տաթև Ֆռանգյան
