06.11.2024 | 12:34
Սպառողին ասում ենք՝ մի գնացեք փոքր խանութներից առևտուր արեք, խոշոր բիզնեսին առավելություն ենք տալիս․ ՏԵՍԱՆՅՈՒԹ
Անտոնիո Գուտերեշը դատապարտել է Քաբուլում ՌԴ դեսպանատան մոտ իրականացված հարձակումը
Քաղաքականություն
06.09.2022 | 16:53
ՄԱԿ-ի գլխավոր քարտուղար Անտոնիո Գուտերեշը խստորեն դատապարտել է Քաբուլում Ռուսաստանի դեսպանատան մոտ տեղի ունեցած հարձակումը: Այս մասին հայտարարել է նրա խոսնակ Ստեֆան Դյուժարիկը, գրում է VOA-ն։
«Գլխավոր քարտուղարն իր ցավակցությունն է հայտնել զոհվածների ընտանիքներին և շուտափույթ ապաքինում մաղթել վիրավորներին։ Գլխավոր քարտուղարը կրկնել է, որ միջազգային մարդասիրական իրավունքով խստիվ արգելվում են հարձակումները խաղաղ բնակչության և քաղաքացիական օբյեկտների, այդ թվում՝ դիվանագիտական ներկայացուցչությունների վրա»,- ասել է Դյուժարիկը։
«Իսլամական պետությունը» ստանձնել է Աֆղանստանի մայրաքաղաքում Ռուսաստանի դեսպանատան վրա հարձակման պատասխանատվությունը, որի հետևանքով զոհվել են դեսպանատան երկու աշխատակիցներ և առնվազն մեկ տեղի բնակիչ։
Պայթյունը որոտացել է դեսպանատան հյուպատոսական բաժնի մուտքի մոտ, որտեղ աֆղանները սպասում էին վիզաների մասին լուրերին, հայտնում են լրատվամիջոցները։
Ռուսական «ՌԻԱ Նովոստի»-ն հայտնել է, որ պայթյունը տեղի է ունեցել այն ժամանակ, երբ ռուս դիվանագետը դուրս է եկել շենքից՝ վիզա ստանալու թեկնածուների անունները հաղորդելու համար։
Քաբուլի ոստիկանության ներկայացուցչի հաղորդմամբ՝ առնվազն մեկ խաղաղ բնակիչ է զոհվել, ևս տասը՝ վիրավորվել հարձակման հետևանքով:
Տաթև Ֆռանգյան
