16.09.2026 | 18:10
Ալեն Սիմոնյանը՝ ռուսական ռազմաբազայի մասին // Նոր Սահմանադրության տեքստը մինչև տարեվերջ կհրապարակվի․ ԼՈՒՐԵՐ
Հերթական տարօրինակ պատահարը «Լուկօյլ»-ի անձնակազմի շրջանում․ տնօրենների խորհրդի նախագահն ընկել է հիվանդանոցի պատուհանից
Քաղաքականություն
01.09.2022 | 13:29
Ռուսաստանի երկրորդ խոշորագույն նավթարդյունահանող ընկերության՝ «Լուկօյլի» ղեկավարը, ով քննադատում էր Մոսկվայի ներխուժումն Ուկրաինա, մահացել է հիվանդանոցի պատուհանից ընկնելու հետևանքով, գրում է Euronews-ը։
Ստացած վնասվածքներից Մագանովը տեղում մահացել է, նրա մարմինը հայտնաբերել է բժշկական անձնակազմը, հայտնում են ռուսական լրատվամիջոցները։
«Այսօր առավոտյան Մագանովն ընկել է Կենտրոնական կլինիկական հիվանդանոցի բաժանմունքի պատուհանից։ Ստացած վնասվածքներից նա մահացել է»,- ասվում է հաղորդագրության մեջ։
Ռուսական իշխանամետ լրատվամիջոցները հայտնում են, որ Մագանովը կարող էր ինքնասպան լինել՝ ցած նետվելով 6-րդ հարկից։
ՌԴ ոստիկանությունն էլ հայտնել է Մոսկվայի արևմուտքում պատուհանից ընկած տղամարդու մահվան մասին, սակայն մահացածի անունը չի նշել։ Ընկերությունը դեռևս չի մեկնաբանել թոփ-մենեջերի մահվան լուրը։
Հիշեցնենք, որ մայիսին էլ առեղծվածային հանգամանքներում մահացել էր «Լուկօյլ» նավթային ընկերության նախկին թոփ մենեջեր, միլիարդատեր Ալեքսանդր Սուբոտինը: Վերջին ամիսների ընթացքում սա ռուսական ընկերությունների թոփ մենեջերների առաջին տարօրինակ մահը չէ: Ավելի վաղ տեղեկություններ հայտնվեցին «Գազպրոմբանկ»-ի նախկին մենեջեր Վլադիսլավ Ավաևի և «Նովատեկ»-ի նախկին ղեկավար Սերգեյ Պրոտոսենիի մահվան մասին: Հետաքննության նախնական վարկածով՝ երկուսն էլ նախ սպանել են ընտանիքի անդամներին, ապա ինքնասպան են եղել։
Տաթև Ֆռանգյան
