Նավալնին կրկին գտնվում է մեկուսարանում՝ բանտում քաղաքական գործունեության համար

Ռուսաստանցի բանտարկված ընդդիմադիր քաղաքական գործիչ Ալեքսեյ Նավալնին երեքշաբթի օրը հայտարարել է, որ մեկ ամսվա ընթացքում երրորդ անգամ իրեն պատժախուց են տեղափոխել՝ քաղաքական գործունեության համար պատժելու նպատակով։ Այս մասին, հղում անելով «Ռոյթերս»-ին, գրում է «Ամերիկայի ձայն»-ը։

Նավալնին 11,5 տարի ազատազրկման է դատապարտված խիստ անվտանգության գաղութում՝ պայմանական վաղաժամկետ ազատման խախտումների, խարդախության և դատարանի նկատմամբ անհարգալից վերաբերմունքի համար, մեղադրանքներ, որոնք նա ասում է, որ հորինված են իր քաղաքական նկրտումները խափանելու և այլախոհությունը խեղդելու համար:

Twitter-ի և Instagram-ի իր էջերում, որոնք երկուսն էլ միլիոնավոր հետևորդներ ունեն, Նավալնին իր փաստաբանների միջոցով գրել է, որ իրեն 7 օրով ուղարկել են պատժախուց:

Նավալնին գրել է, որ ամբողջ խնդիրն այն է, որ ինքը «չափազանց քաղաքական ակտիվ է բանտարկյալի համար»։

«Իմ կողմից ստեղծված բանտարկյալների արհմիությունը մեծ վրդովմունք է առաջացնում. «նրանց բանտ չեն նստեցրել, որ այստեղ արհմիություններ կազմակերպեն»,- հայտարարել է նա։

Նավալնին ասել է, որ Ռուսաստանի կողմից արգելված Հակակոռուպցիոն հիմնադրամի (FBK) արշավը՝ ուղղված միջազգային պատժամիջոցները Ռուսաստանի ավելի շատ հարուստ և հզոր մարդկանց նկատմամբ, դրդեց վերջիններին կիրառել միջոցներ՝ իրեն և հիմնադրամին ստիպողաբար «հանգստի անցնելու» համար:

Նավալնին կրկին արտահայտվել է Ուկրաինայի դեմ Ռուսաստանի սանձազերծած պատերազմի դեմ։

«Եվ դա ինձ համար ավելի վատ չէ, քան շատերի համար, ես այստեղ ռումբերի տակ չեմ: Ես ատում եմ այս պատերազմը, և ես և Հակակոռուպցիոն հիմնադրամի իմ գործընկերները փորձում ենք գոնե ինչ-որ բան անել, որպեսզի մոտենանք դրա ավարտին»,- գրել է նա։ «Պուտինյան կոռումպացված վերնախավի վրա ճնշումը, այն է, ինչ հիմա անհրաժեշտ է»։

Անցյալ շաբաթ Նավալնին ասել է, որ հինգ օր է ստացել պատժախցում, քանի որ անմիջապես չի արձագանքել շարասյան հրամանին՝ ձեռքերը մեջքի հետևում դնելու համար:

Օգոստոսի 15-ին Նավալնին ասել էր, որ իրեն երեք օրով մեկուսացրել են բանտային համազգեստի վերին կոճակը չկոճկելու պատճառով, որը, ըստ նրա, շատ փոքր է իր համար:

Իր վերջին ուղերձում քաղաքական գործիչը բացատրել է, որ մեկուսարանում ինքը պետք է նստի «երկաթե աթոռակի վրա՝ 2×3 մետրանոց խցում»։