27.07.2026 | 23:18
Ոստիկանները ձերբակալել են ապօրինի զենք պահող տղամարդուն
ԵՄ-ն կհրաժարվի ռուսաստանցիներին պարզեցված կարգով վիզաների տրամադրման մասին համաձայնագրից․ FT
Քաղաքականություն
29.08.2022 | 12:17
ԵՄ անդամ երկրների արտգործնախարարները կաջակցեն Ռուսաստանի քաղաքացիներին շենգենյան վիզաների տրամադրման պարզեցված ընթացակարգի վերացման գաղափարին, գրում է Financial Times թերթը։ ԵՄ մեկնող ռուսները ստիպված կլինեն ավելի բարձր գին վճարել և ավելի երկար սպասել տուրիստական վիզայի համար։
Ռուսաստանի և Եվրամիության միջև վիզային ռեժիմի դյուրացման համաձայնագիրը գործում է 2007 թվականից։ Պայմանագրի չեղարկումը կնշանակի, որ ՌԴ քաղաքացիները կվճարեն ոչ թե 35, այլ 70 եվրո։
Բացի այդ, կբարդանա ընթացակարգը․ անհրաժեշտ կլինի ավելի շատ փաստաթղթեր տրամադրել, ինչը զգալիորեն կձգձգի դիմումների քննարկման գործընթացը։
Օգոստոսի 31-ին ԵՄ արտաքին գործերի նախարարները Պրահայում ԵՄ արտաքին գործերի խորհրդի ոչ պաշտոնական հանդիպմանը կքննարկեն այս հարցը։
Լատվիան, Էստոնիան, Լիտվան, Չեխիան, Լեհաստանը և Ֆինլանդիան կողմ են ռուսներին շենգենյան վիզաների տրամադրման համաեվրոպական արգելքին։
Նման կոշտ միջոցներին դեմ են ԵՄ առաջատար մի շարք երկրներ, այդ թվում՝ Ֆրանսիան և Գերմանիան։
Գերմանիայի կանցլեր Օլաֆ Շոլցը, մասնավորապես, ասել է, որ, իր կարծիքով, Եվրոպան պետք է հնարավորություն Վլադիմիր Պուտինի քաղաքականությանը դեմ ռուսաստանցիներին հեռանալ երկրից։
Կիրակի օրը ԵՄ դիվանագիտական գերատեսչության ղեկավար Ժոզեպ Բորելը ևս ասել է, որ ամբողջական արգելքի գաղափարը դժվար թե աջակցություն ստանա առաջիկա հանդիպմանը։ «Չեմ կարծում, որ ռուս խաղաղ բնակչության հետ հարաբերությունների դադարեցումը կօգնի, և չեմ կարծում, որ այդ գաղափարը միաձայն աջակցություն կստանա։ Մենք պետք է ավելի ընտրողական լինենք։ Ես չեմ աջակցում բոլոր ռուսներին վիզաների տրամադրման դադարեցմանը»,- ասել է Բորելը ավստրիական ORF հեռուստաալիքին տված հարցազրույցում։
Տաթև Ֆռանգյան
