22.04.2026 | 16:00
ՀՀ դպրոցականները մեդալներ են նվաճել ինֆորմատիկայի միջազգային օլիմպիադայում
Ուժի մեջ է մտել Ռուսաստանից ածխի ներմուծման` ԵՄ էմբարգոն
Քաղաքականություն
01.08.2022 | 16:15
Օգոստոսի 1-ից ուժի մեջ է մտել Ռուսաստանից ածխի ներմուծման՝ Եվրամիության էմբարգոն։ Սահմանափակումները նախատեսված էին ապրիլի 8-ին հաստատված հակառուսական պատժամիջոցների հինգերորդ փաթեթով։
Փաստաթղթում նշվում է, որ ածխի և այլ պինդ հանածո վառելիքի գնման, ներմուծման և ԵՄ տեղափոխման արգելքը, եթե այն արդյունահանվի կամ արտահանվի Ռուսաստանից, ուժի մեջ կմտնի 2022 թվականի օգոստոսից։
Պատժամիջոցների հինգերորդ փաթեթի վերաբերյալ Եվրահանձնաժողովի պարզաբանումներում ասվում է, որ ածխի ներմուծման էմբարգոն կվնասի Ռուսաստանի Դաշնությանը, քանի որ ԵՄ-ին բաժին է ընկնում ռուսական արտահանման մեկ քառորդը։
«Դա կհանգեցնի Ռուսաստանի համար տարեկան մոտ ութ միլիարդ եվրոյի չափով հասույթի կորստի: Գործող պայմանագրերի համար նախատեսված է 4-ամսյա խզման ժամկետ»,- նշել են ԵՀ-ում:
Հիշեցնենք, որ բացի ածխից՝ Ռուսաստանի դեմ ԵՄ պատժամիջոցների հինգերորդ փաթեթը ներառում է ներմուծման արգելք փայտի, քիմիական նյութերի, շքեղության դասի ապրանքների համար։ Այն նաև վերաբերվել է ավելի քան 200 ֆիզիկական անձանց, մի շարք ընկերությունների և բանկերի։
Տաթև Ֆռանգյան
