20.06.2026 | 23:35
ԱԱ-2026. Նիդերլանդները 5 գոլ խփեց Շվեդիային. ՏԵՍԱՆՅՈՒԹ
Թուրքիան անընդունելի է համարում Հունաստանի գործողությունները՝ դրանք որակելով ոչ բարիդրացիական
Քաղաքականություն
22.07.2022 | 21:06
Թուրքիայի նախագահ Ռեջեփ Թայիփ Էրդողանի գլխավորությամբ նախօրեին տեղի է ունեցել Անվտանգության խորհրդի նիստ, որի արդյունքներով տարածվել է պաշտոնական հայտարարություն, գրում է Անադոլու գործակալությունը։
Նշվում է, որ Թուրքիայի Անվտանգության խորհրդի նիստում տեղեկություններ են ներկայացվել երկրում ազգային միասնության և համերաշխության խախտման դեմ գործողությունների, բոլոր տեսակի սպառնալիքների և վտանգների մասին, հատկապես՝ PKK/KCK, PYD/YPG, FETO և ԻԼԻՊ ահաբեկչական կազմակերպությունների մասին։
Բացի այդ Թուրքիայի ԱԽ-ն ևս մեկ անգամ նախազգուշացրել ու սպառնացել է Հունաստանին։
«Հունաստանի գործողությունները, որոնք համառորեն բարիդրացիության ու դաշնակցային հարաբերությունների դեմ դիրք են զբաղեցնում, անտեսում են միջազգային իրավունքը, մեծացնում տարածքային ջրերի ու օդային տարածքի խախտումները և ի հավելում իր սադրիչ գործողությունների` հանդիսանում են անընդունելի»,-ասվում է հայտարարության մեջ։
Թուրքիայի անվտանգության խորհուրդը նաև Հունաստանին կոչ է անում «վերջ տալ մարդու իրավունքների և մարդասիրական իրավունքի ոլորտում անօրինական գործողություններին, որոնք վտանգում են անօրինական միգրանտների կյանքը»։
Բացի այդ խորհուրդը կոչ է անում դադարեցնել Ուկրաինայի ու ՌԴ-ի միջև պատերազմը:
Հավելենք, որ վերջին շրջանում բավականին սրվել են Աթենքի ու Անկարայի հարաբերությունները։ Թուրքիայի բարձրաստիճան պաշտոնյաները, այդ թվում՝ նախագահ Էրդողանը, պարբերաբար Հունաստանին սպառնում են։
Էմմա Չոբանյան
