Հասարակություն
18.07.2022 | 22:13Երևանի Լեո փողոցի 12 շենքի բնակիչներն ահազանգում են, որ շենքի հարևանությամբ՝ ԱԻՆ Հիդրոմետ ծառայության նախկին շենքի տարածքում, որտեղ տարիներ առաջ հյուրանոցի կառուցման շինաշխատանքներ են սկսվել, կառուցապատողն ուզում է քանդել Լեո 12 և 54 շենքերի բաժանարար պատը։ Քաղաքացիները պնդում են՝ դա արվում է, որպեսզի լուծվի ապագա հյուրանոցի ավտոկայանատեղիի հարցը։
«Մենք դեմ ենք, որ մեքենաները մեր բակով գիշեր-ցերեկ մտնեն-դուրս գան»,- ասում է Լեոյի 12 շենքի բնակիչ Վարդան Հովսեփյանը։
Տարածքի սեփականատերը «ԿԱՄ Դեվելոփմենթս» ՍՊԸ-ն է, Լեոյի 54 հասցեի նկատմամբ սեփականության իրավունքն ընկերությունը գրանցել է 2018թ․ մայիսի 23-ին։ Կառուցապատող ընկերությունը «Առ արտ» ՍՊԸ-ն է։ Ընկերությունը 54 հասցեում հյուրանոց կառուցելու շինթույլտվությունը ստացել է քաղաքապետարանից, բայց բնակիչները պնդում են՝ ահա այս պատը քանդելու թույլտվություն տրված չէ․
«Կցված են մի քանի նախագծի լուսանկարներ՝ առանց կնիքի, ոչ մի հաստատված նախագիծ ու օրինական հիմք չկա»,- ընդգծում է շենքի բնակիչ, մասնագիտությամբ ճարտարապետ Արտակ Ղուլյանը։
Բնակիչները ասում են, որ այդ պատի փլուզումը կհանգեցնի մի շարք խնդիրների․ առանցքայինը սակայն այն է, որ մեքենաների ելումուտն իրենց բակով կխանգարի բնականոն առօրյան։
Մեր նկարահանման ընթացքում տարածքում ոստիկանության ծառայողներ կային, ահազանգից հետո էլ շինհրապարակ եկան կառուցապատող ընկերության պատասխանատուները և ներկայացուցիչ քաղաքապետարանից։ Բնակիչներին ցույց տվեցին նախագիծը, որը մինչ այդ ցույց չէին տալիս։ Շենքի բնակիչ, մասնագիտությամբ ճարտարապետ Արտակ Ղուլյանի պնդմամբ այն մասամբ է օրինական։
«Փորձաքննության կնիքը ամեն էջի վրա պիտի լինի, դուք կարող եք ամեն ինչ քանդել-կազմել»,- պնդում է Ղուլյանը։
«4 մետրանոց դարպաս է դրվելու, որ սնունդը ստանանք, կայանատեղի չի լինելու»,- բնակիչներին հակադարձում է «Առ արտ» ՍՊԸ-ի լիազորված անձ Համլետ Հովհաննիսյանը։
Ի վերջո, եկան համաձայնության, որ պատը չի քանդվելու, քանի դեռ քաղաքապետարանը փորձաքննություն չի իրականացրել և պարզել՝ նախագծով պատը քանդելու թույլտվություն տրված եղել է, թե ոչ։ Կառուցապատող ընկերության պատասխանատուն էլ վստահեցրեց՝ չեն քանդի մինչև քաղաքապետարանից պատասխան չստանան։ Բայց մինչ կողմերը զրուցում էին, Factor TV-ի նկարահանման ընթացքում հենց մեր աչքի առաջ ու տեսախցիկի օբյեկտիվում պատի մի հատվածը փլուզվեց։
Փլուզման հետևանքով մանր քարեր էին լցվել մոտակայքում կայանած ավտոմեքենայի վրա, սակայն, բարեբախտաբար, ոչ ոք չէր տուժել։
Տարածքի բնակիչները պնդում են՝ պատի մի մասը ոչ թե փլուզվել է, այլ քանդել են հակառակ կողմում շինարարությունն իրականացնողները և, տեսնելով, որ մեքենա է կայանված, չեն շարունակել գործողությունները։
Բնակիչները որոշեցին՝ գրավոր դիմել Երևանի քաղաքապետին։ Պատն ամբողջությամբ կքանդվի թե ոչ՝ կորոշի քաղաքապետարանը։
Մանրամասները՝ տեսանյութում։
Արփի Հակոբյան
