Պեկինը պատրաստակամություն է հայտնել աջակցելու ուկրաինական ճգնաժամի խաղաղ կարգավորմանը

Չինաստանը ներգրավված չէ ուկրաինական պատերազմի մեջ, բայց չի պատրաստվում ձեռքերը ծալած նստել՝ հետևելով իրավիճակին։ Այս մասին DW-ի փոխանցմամբ՝ հայտարարել է ԱԳ նախարար, ՉԺՀ Պետական խորհրդի անդամ Վան Ին՝ հունգարացի գործընկեր Պետեր Սիյարտոյի հետ հեռախոսազրույցից հետո։ Հայտարարության տեքստը հրապարակել է Չինաստանի ԱԳՆ-ն։

Վան Ին հայտարարել է, որ այն, ինչ կատարվում է Ուկրաինայում , լուրջ ազդեցություն է թողել ոչ միայն Եվրոպայի վրա։ Բացասական կողմնակի ազդեցությունները տարածվել են ամբողջ աշխարհում, նշել է արտգործնախարարը։ Նա հիշեցրել է, որ հուլիսի 7-8-ին Ինդոնեզիայի Բալի կղզում G-20-ի արտգործնախարարների հանդիպման ժամանակ Չինաստանը առաջարկներ է ներկայացրել՝ լուծելու համաշխարհային պարենային և էներգետիկ անվտանգության խնդիրը։

Չինացի դիվանագետը հավելել է, որ Պեկինը չի պատրաստվում «ուկրաինական ճգնաժամի կրակի վրա յուղ լցնել» ։ Չինաստանի ԱԳՆ ղեկավարը վստահ է, որ բոլոր կողմերը պետք է քննարկեն հավասարակշռված, արդյունավետ և կայուն եվրոպական անվտանգության ճարտարապետության ստեղծման հարցը՝ կայուն խաղաղության հասնելու համար։

Ինչպես նշել է Չինաստանի ԱԳՆ-ը, Պիտեր Սիյարտոն կարծիք է հայտնել, որ Չինաստանը երբեք Եվրոպային մրցակից չի եղել, այլ համագործակցության հնարավորություններ բացող գործընկեր։

Հունգարիան կշարունակի հավատարիմ մնալ ԵՄ-ի և Չինաստանի միջև համագործակցության զարգացմանը՝ փոխադարձ հարգանքի, արդարության և փոխշահավետության հիման վրա, ասել է Սիյարտոն, որի խոսքերն է մեջբերում չինական կողմը։

Չինաստանը կաջակցի ուկրաինական ճգնաժամի խաղաղ կարգավորմանը նպաստելու բոլոր ջանքերին՝ կենտրոնանալով բանակցությունների միջոցով այդ խնդրի լուծման վրա, հուլիսի 8-ին Ինդոնեզիայում կայացած հանդիպման ժամանակ իր ռուս գործընկեր Սերգեյ Լավրովի հետ զրույցում ասել է Վան Ին։ Համաշխարհային անկայունության պայմաններում Չինաստանը և Ռուսաստանը ցուցադրում են կայուն և ռազմավարական ամուր հարաբերություններ, հայտարարել է չինացի դիվանագետը։

Տաթև Ֆռանգյան