20.11.2024 | 18:30
Կարինե Քոչարը՝ Ռուբեն Քոչարի մեղադրանքների մասին
Գյումրու ծննդատանը լույս աշխարհ է եկել Խաչատրյանների 14-րդ զավակը
11.07.2022 | 14:27
Գյումրու ծննդատանը ծնվել է Լիլիթ և Եղիշե Խաչատրյանների 14-րդ զավակը․ փոքրիկին անվանել են Աննա։
40-ամյա բազմազավակ մայրը՝ Լիլիթ Խաչատրյանը, Factor TV-ի հետ զրույցում ասաց, որ 7 տղա և 7 աղջիկ ունի, երեխաներից 5-ը դպրոցական են։ Մեծ դստերը՝ 22-ամյա Շուշանին, վերջերս են ամուսնացրել։ Նա նկարչուհի է, երեխաներից մի քանիսը նույնպես զբաղվում են արվեստով, տարբեր երաժշտական գործիքներ են նվագում։
«14 երեխաների մայր լինելը, բնականաբար, հեշտ չէ, դժվարություններ շատ կան, բայց դրանք հաղթահարելի են։ Հատկապես մեր քաղաքի պայմաններում դժվար է երեխաներին մեծացնելը, ամուսինս աշխատում է, հաղթահարում ենք, պետությունից ո՛չ ակնկալիք կա, ո՛չ էլ օգնություն։ Միակ օգնությունը նպաստն է, բայց, փա՛ռք Աստծո, ապրում ենք։ Պետության կողմից բազմազավակությունը խրախուսելու միջոցներից մեկը եղել է 2016 թվականին, երբ մեզ բնակարան տրամադրեցին, դրանից հետո կոնկերտ ես չեմ զգում բազմազավակության խրախուսման դեպքեր։ Կարծում եմ՝ ճկուն ծրագրեր են պետք։ Ամուսինս արհեստավոր է, շատ դեպքերում արտագնա աշխատանքի է մեկնում Ռուսաստանի Դաշնություն, Գյումրու պայմաններում դժվար է հաց վաստակելը»,- ասաց Լիլիթ Խաչատրյանը։
Նա հայ մայրերին խորհուրդ է տալիս մտածել ժողովրդագրական խնդիրների մասին, հատկապես՝ 44-օրյա պատերազմի ծանր կորուստներից հետո։
«Ամեն երեխա Աստծո պարգևն է, ամեն երեխա իր «ղսմաթն» ունի, բազմազավակ երեխաների մայր լինելը ուրախություն է։ Պետությունը ևս պիտի խրախուսի, որ մայրերը չխուսափեն երեխաներ ունենալուց, կարողանան պահել, շատերը հենց սոցիալական խնդիրներից ելնելով երեխաներ չեն ունենում։ Բայց քանի տղաներ կորցրեցինք պատերազմին, մի՞թե չպիտի մտածենք մեր ազգի մասին»,- ասաց Լիլիթ Խաչատրյանը։
Ի դեպ, նա հաջորդ տարի բանակ կճանապարհի բժշկական քոլեջում սովորող որդուն՝ Զավենին։
Արմիկ Մովսիսյան
