Գևորգ Պետրոսյանի դատախազ եղբայրը ձերբակալվել, ապա ազատ է արձակվել

ԱԺ նախկին պատգամավոր Գևորգ Պետրոսյանի եղբայրը՝ դատախազ Էդգար Պետրոսյանը, բերման է ենթարկվել Ոստիկանություն և ձերբակալվել:

ՀՀ քննչական կոմիտեի մամուլի խոսնակ Վարդան Թադևոսյանը Factor.am-ին հայտնեց, որ Էրեբունի և Նուբարաշեն վարչական շրջանների դատախազության ավագ դատախազ Էդգար Պետրոսյանին պարեկները կանգնեցրել են Նոր Նորք վարչական շրջանում գտնվող «Երևան սիթի» սուպերմարկետի մոտ, սակայն վերջինս, չենթարկվելով պարեկների հորդորին, մեքենան վարել է մինչև իր տուն:

«Ինքը գնացել է տուն, պարեկները հետապնդել են․ իր տունը գտնվում է Ավան վարչական շրջանի Դուրյան թաղամասում: Այս թաղամասի տների մի հատվածը Կոտայքի տարածքի մեջ է մտնում, այդ պատճառով գործը փոխանցվել է ՀՀ քննչական կոմիտեի Կոտայքի մարզային քննչական վարչություն: Գործը վարույթ է ընդունվել, ուղարկվել է Կոտայքի մարզի դատախազություն»,- մանրամասնեց Թադևոսյանը։

Նա տեղեկացրեց, որ Էդգար Պետրոսյանը ձերբակալվելուց 6 ժամ անց ազատ է արձակվել։ Գլխավոր դատախազության խոսնակ Արևիկ Խաչատրյանն էլ Factor.am-ի հետ զրույցում ասաց, որ Պետրոսյանին ազատ են արձակել, քանի որ գործը հսկող դատախազի որոշմամբ՝ ձերբակալումը համարվել է ապօրինի:

Նշենք, որ, ըստ մամուլի հրապարակումների, դատախազ Էդգար Պետրոսյանը եղել է ալկոհոլի ազդեցության տակ, իսկ բերման ենթարկվելիս դիմադրել է: Արդյունքում պարեկային ծառայության աշխատակիցները ստիպված են եղել արցունքաբեր գազ կիրառել: Ոստիկանությունից այս մասին մեզ որևէ տեղեկություն չտրամադրեցին։

Արփի Հակոբյան