Սպիտակ տունն այլևս չի հավատում, որ Ուկրաինան կկարողանա վերադարձնել պատերազմում կորցրած իր բոլոր տարածքները․ CNN

Սպիտակ տունը սկսել է կասկածել, որ Ուկրաինան կկարողանա վերադարձնել պատերազմի չորս ամիսների ընթացքում կորցրած բոլոր տարածքները, նույնիսկ այն ծանր սպառազինությամբ, որը Կիևը խնդրում է։ Այս մասին հայտնում է CNN-ը՝ վկայակոչելով ամերիկյան վարչակազմում իր աղբյուրներին, փոխանցում է BBC-ի ռուսական ծառայությունը։

Ըստ ԱՄՆ նախագահ Ջո Բայդենի որոշ անանուն խորհրդականների՝ հնարավոր է՝ ժամանակն է, որ Վլադիմիր Զելենսկին Ուկրաինայի հաղթանակի համար նոր չափորոշիչներ որոշի ու ճանաչի, որ իր երկիրը չափերով փոքրացել է։

Նշվում է, որ ԱՄՆ պաշտոնյաների տրամադրությունը փոխվել է վերջին մի քանի շաբաթվա ընթացքում, քանի որ Ուկրաինան անհաջող պայքարում է Դոնբասում Ռուսաստանի հարձակումը զսպելու համար և օրական մինչև 100 զինվորի ծանր կորուստներ կրում։

CNN-ի աղբյուրներն ընդգծում են, որ ամերիկյան շրջանակներում հոռետեսությունը ոչ մի կերպ չի նշանակում, որ ԱՄՆ-ն ինչ-որ կերպ կհամոզի Ուկրաինային գնալ տարածքային զիջումների՝ պատերազմը դադարեցնելու համար։ Բացի այդ, բազմաթիվ ռազմական փորձագետներ, այդ թվում՝ ամերիկյան, կանխատեսում են, որ այս տարվա երկրորդ կեսին ուկրաինական բանակը կկարողանա հակահարձակում սկսել և հետ վերցնել տարածքների մի մասը։

Բացի այդ, Բայդենի խորհրդականներից մեկն ասել է, որ Ուկրաինայի ապագան, այդ թվում՝ սահմանների առումով, կախված է այն օգնությունից, որը կցուցաբերի Արևմուտքը։ Աղբյուրի խոսքով՝ Ուկրաինան պաշտոնապես պահանջել է ԱՄՆ-ից առնվազն 48 բազմակի հրթիռային կայանք, սակայն Պենտագոնը մինչ օրս խոստացել է ընդամենը ութը:

Էմմա Չոբանյան