Նիկոլ Փաշինյանը պատասխանում է ԶԼՄ-ների և ՀԿ-ների հարցերին․ ՈՒՂԻՂ

Մեկնարկել է ՀՀ վարչապետի հերթական առցանց ասուլիսը։ Նիկոլ Փաշինյանը ֆեյսբուքյան էջի ուղիղ եթերում պատասխանում է ԶԼՄ-ների և հասարակական կազմակերպությունների հարցերին: Նախատեսված է, որ հարցուպատասխանը կտևի մոտ 2 ժամ:

Առցանց ձևաչափով ասուլիս կազմակերպելն արժանացել է մեդիադաշտի զգալի հատվածի քննադատություններին․ «Այդ ասուլիսների ընթացքում լրատվամիջոցների ուղարկած հարցերը խմբավորվում և խմբագրվում են վարչապետի աշխատակազմում, ինչի արդյունքում հաճախ փաստացի աղավաղվում է հարցի բովանակությունը կամ սղվում են հարցի որոշ նրբերանգները, երբեմն էլ որոշ հարցեր ընդհանրապես չեն հնչեցվում։ Արդյունքում, ըստ էության, սահմանափակվում է հանրության՝ պատշաճ լրատվություն ստանալու հնարավորությունը։ Համարում ենք, որ երկրի ղեկավարի՝ նման ձևաչափով շփումը լրատվամիջոցների հետ խտրական է, ոչ արդյունավետ և հակասում է ժողովրդավարության առանցքային՝ թափանցիկության և հաշվետվողականության սկզբունքներին»,- մասնավորապես ասված է մի խումբ լրատվամիջոցների հայտարարության մեջ, որի տակ ստորագրել են «Առավոտ» օրաթերթը, «Ա1+»-ը, «Ինֆոքոմը», «Մեդիալաբը», «Սիվիլնեթը», «Փաստերի ստուգման հարթակը», «Ազատությունը»։

Եվս մի քանի տասնյակ լրատվամիջոցներ մեկ այլ հայտարարություն են տարածել՝ մասնավորապես հայտարարելով․ «Մենք՝ ներքոստորագրյալ լրատվամիջոցների խմբագիրներս, հրապարակավ հրաժարվում ենք ձևական հարց ուղարկելուց: Կոչ ենք անում վարչապետի աշխատակազմին վերադառնալ ասուլիսի դասական ձևին»։

Factor. am-ը, կիսելով մեր գործընկերների մտահոգությունը, այնուհանդերձ, չի միացել ներկայացված հայտարարություններին՝ որոշելով օգտագործել վարչապետին հարց ուղղելու հնարավորությունը։ Իսկ թե ինչ հարց ենք ուղղել Նիկոլ Փաշինյանին՝ կտեղեկանաք՝ հետևելով մեր ուղիղ հեռարձակմանը։