26.11.2024 | 12:49
NYMEX. Թանկարժեք մետաղների գները նվազել են
G7-ի չորս երկրներ կարգելեն Ռուսաստանից ոսկու ներկրումը
Քաղաքականություն
26.06.2022 | 21:57
Մեծ Բրիտանիան, ԱՄՆ-ը, Ճապոնիան և Կանադան որոշել են ընդլայնել Ռուսաստանի դեմ սահմանված պատժամիջոցները ՝ Ուկրաինա ներխուժելու համար: «Մեծ յոթնյակի» (G7) այս չորս երկրները մոտ ժամանակներս արգելք կսահմանեն ռուսական ոսկու ներմուծման համար: DW-ի փոխանցմամբ՝ ասված է բրիտանական կառավարության մամուլի ծառայության հաղորդագրության մեջ:
Փաստաթղթում նշվում է, որ գագաթնաժողովում Մեծ Բրիտանիայի վարչապետ Բորիս Ջոնսոնը համոզելու է G7-ի մյուս պետություններին միանալ արգելքին:
Ըստ բրիտանական կառավարության՝ այդ միջոցներն «ուղղակիորեն կազդեն ռուս օլիգարխների վրա» և ՌԴ նախագահ Վլադիմիր Պուտինի «պատերազմական մեքենայի հենց սրտի վրա»։
«Անհրաժեշտ է փակել փողերի ծորակը դեպի պուտինյան ռեժիմ»,- ասվում է մամուլի ծառայության հաղորդագրության մեջ։
Փաստաթղթում նշվում է նաև, որ ռուսական ոսկու ներկրման արգելքը՝ հաշվի առնելով Լոնդոնի կենտրոնական դերն այս թանկարժեք մետաղի միջազգային առևտրում և ԱՄՆ-ի, Ճապոնիայի և Կանադայի կողմից ձեռնարկվող զուգահեռ միջոցները, կունենան «գլոբալ հետևանքներ և կհեռացնեն ռուսական ոսկին պաշտոնական միջազգային շուկաներից»։ Այս պատժամիջոցների նպատակը Ռուսաստանին միջազգային ֆինանսական համակարգից ավելի մեկուսացնելն է, ընդգծվում է մամուլի հաղորդագրությունում։
Եվրամիությունում քննարկումներ են ընթանում նաև ոսկու առևտրի ոլորտում Ռուսաստանի դեմ պատժամիջոցների շուրջ, սակայն որևէ որոշում դեռ չի ընդունվել: Եվրոպայից G7-ին անդամակցում են Գերմանիան, Ֆրանսիան և Իտալիան։
Բացի էներգակիրներից, ոսկու վաճառքը ռուսական արտահանման կարևորագույն ուղղություններից մեկն է։ Անցած տարի Ռուսաստանը 14,6 մլրդ եվրոյի ոսկի է արտահանել։
«Ռուսական էլիտայի համար այդ ոսկու արժեքը վերջին ամիսներին բարձրացել է, քանի որ օլիգարխները ոսկու ձուլակտորներ են գնում, որպեսզի խուսափեն արեւմտյան պատժամիջոցների հետեւանքներից”, – նշվում է բրիտանական կառավարության մամուլի տեղեկագրում:
