Քաղաքականություն
22.06.2022 | 22:56
Մշակվում է ԲՐԻԿՍ-ի երկրների արժույթների զամբյուղի հիման վրա միջազգային պահուստային արժույթ ստեղծելու հարցը (հինգ երկրների խումբ՝ Բրազիլիա, Ռուսաստան, Հնդկաստան, Չինաստան, Հարավային Աֆրիկա)։ Սպուտնիկի փոխանցմամբ՝ այս մասին հայտարարել է ՌԴ նախագահ Վլադիմիր Պուտինը ԲՐԻԿՍ-ի անդամ երկրներին ուղղված իր տեսաուղերձում։
«ԲՐԻԿՍ-ի գործընկերների հետ մշակվում են միջազգային հաշվարկների հուսալի այլընտրանքային մեխանիզմներ, Ռուսաստանի ֆինանսական հաղորդագրությունների համակարգը բաց է «հնգյակի» երկրների բանկերին միացնելու համար: Ընթանում է ռուսական «Միր» վճարային համակարգի օգտագործման աշխարհագրության ընդլայնում։ Մշակվում է մեր երկրների արժույթների զամբյուղի հիման վրա միջազգային պահուստային արժույթ ստեղծելու հարցը»,- ասել է Պուտինը։
Նրա խոսքով՝ ներկայում ռուսաստանյան գործարար շրջանակները բանակցություններ են վարում Ռուսաստանում հնդկական խանութների ցանցի բացման շուրջ, ավելացվում է նաև չինական մեքենաների, սարքավորումների և տեխնիկայի մասնաբաժինը ռուսական շուկայում։
Տաթև Ֆռանգյան
