Քաղաքականություն
21.06.2022 | 13:23
Ազգային ժողովի «Պատիվ Ունեմ» խմբակցության ղեկավար Արթուր Վանեցյանը պատգամավորական մանդատը վայր դնելու դիմում է ներկայացրել Ազգային ժողովի նախագահին։ Տեղեկությունը Factor.am-ի հետ զրույցում հաստատեց ԱԺ նախագահի մամուլի խոսնակ Ծովինար Խաչատրյանը։
Հիշեցնենք, որ Արթուր Վանեցյանը ապրիլի 17-ից ակցիաներ էր սկսել Նիկոլ Փաշինյանի հրաժարականի պահանջով։ Շուրջ երկու ամիս հանրահավաքներից հետո Վանեցյանն ու մյուս ընդդիմադիրները չկարողացան իշխանափոխության հասնել։ Արթուր Վանեցյանը պայքարի օրերին հայտարարել էր, որ եթե Փաշինյանը հրաժարական չտա, ինքը ԱԺ չի վերադառնա։
Նշենք, որ ԱԺ-ն պատգամավորի հրաժարականի դիմում ստանալուց հետո հանդես է գալիս հայտարարությամբ։ Եթե մեկ շաբաթվա ընթացքում պատգամավորը դիմումը հետ չի վերցնում, ապա լիազորությունները դադարում են։
«Պատիվ Ունեմ» դաշինքի նախընտրական ցուցակով հաջորդ թեկնածուն Մարտուն Կամոյի Գրիգորյանն է։ Վանեցյանի հեռանալուց հետո հենց նախկին ԲՀԿ-ական պատգամավորը կարող է վերադառնալ խորհրդարան։
