28.07.2026 | 14:04
Սկանդալ ԱՄՆ-ի և Ֆրանսիայի միջև ՄԱԿ-ի ԱԽ-ում․ ԱՄՆ պատվիրակությունը Ֆրանսիայի ներկայացուցչի ելույթի ժամանակ լքել է դահլիճը
Պուտինը հայտարարել է, թե «հատուկ ռազմական գործողության» բոլոր խնդիրներն իրականացվելու են
Քաղաքականություն
17.06.2022 | 20:12
ՌԴ նախագահ Վլադիմիր Պուտինը խոսել է Ուկրաինա ռուսական ներխուժման մասին՝ կրկնելով, թե «հատուկ ռազմական գործողության» բոլոր առաջադրանքները կատարվելու են, փոխանցում է BBC-ի ռուսական ծառայությունը։
Նա կրկին ասել է, որ «օպերացիայի» նպատակը Դոնբասի բնակիչներին պաշտպանելն է։ Պուտինի խոսքով՝ հատուկ գործողություն սկսելու «որոշումը բարդ էր, բայց հարկադրված»։
«Դա նպատակ ուներ պաշտպանել Դոնբասի բնակիչներին, որոնք ութ տարի ենթարկվում էին ցեղասպանության»,- հայտարարել է Պուտինը։
Նրա խոսքով՝ արևմտյան երկրները փորձել են Ուկրաինայում իրականացնել «հակառուսական նախագիծ» (Պուտինն առաջին անգամ օգտագործել է այս տերմինը մեկ տարի առաջ) և Ուկրաինա զենք ու ռազմական խորհրդատուներ են ուղարկել՝ անտեսելով երկրի տնտեսությունը։
«Այժմ ռուս զինվորներն ու սպաները կռվում են Ուկրաինայում, այդ թվում՝ պաշտպանելու Ռուսաստանի անվտանգ զարգացումն ապահովելու իրավունքը։ «Հատուկ ռազմական գործողության» բոլոր խնդիրները կլուծվեն: Դրա գրավականը մեր զինվորների քաջությունն ու հերոսությունն է և ռուսական հասարակության համախմբումը, որի աջակցությունն ուժ է տալիս բանակին և նավատորմին»,- ասել է Պուտինը։
Տաթև Ֆռանգյան
