Քաղաքականություն
31.05.2022 | 16:39
Ուկրաինական Պոլտավայի մարզի Կոտելևսկի շրջանային դատարանը ռուս զինծառայողներ Ալեքսանդր Բոբիկինին և Ալեքսանդր Իվանովին դատապարտել է 11,5 տարվա ազատազրկման՝ պատերազմի օրենքներն ու սովորույթները խախտելու համար (Ուկրաինայի Քրեական օրենսգրքի 348-րդ հոդված), փոխանցում է DW-ի ռուսական ծառայությունը։
Հետաքննության տվյալների համաձայն՝ փետրվարի 24-ին՝ Ուկրաինա ռուսական ներխուժման առաջին օրը, Բոբիկինը և Իվանովը «Գրադ» բազմակի հրթիռային կայանքից գնդակոծել են Խարկովի շրջանը, նախ՝ Ռուսաստանի, ապա՝ ուկրաինական տարածքից՝ ավերելով քաղաքացիական ենթակառուցվածքները, բնակելի շենքեր Կազաչյա Լոպան գյուղում և Վետերինարնոյե գյուղում անասնաբուժական լիցեյը։
Բոբիկինի և Իվանովի ռազմական շարասյունը պարտություն է կրել պատերազմի առաջին օրը։ Իվանովը հանձնվել է հաջորդ օրը, իսկ վիրավոր Բոբիկինին մի քանի օր անց գտել են Խարկովի ծայրամասում գտնվող դատարկ բնակարանում։
Ամբաստանյալներն ամբողջությամբ ընդունել են իրենց մեղքը, ուստի դատարանը չի հետազոտել ապացույցները, հայտնում է DW-ն։ Պետական մեղադրող կողմը ռուս զինվորների համար խնդրել է 12 տարվա ազատազրկում՝ նշելով, որ հանցագործությունը կատարվել է «մի խումբ անձանց կողմից նախնական համաձայնությամբ»։
Պաշտպանական կողմը պահանջել է 8 տարի ժամկետով ազատազրկում՝ մատնանշելով ամբաստանյալների անկեղծ զղջումը և հրամանատարության ճնշման տակ գործելու փաստը։ Դատարանը, որպես մեղմացուցիչ հանգամանք, հաշվի է առել մեղադրյալի անկեղծ զղջումը, սակայն մերժել է այն փաստարկը, որ հանցագործությունը կատարվել է հարկադրանքով։
«Մեղավորությունն ամբողջությամբ ապացուցված է գործի նյութերում առկա ապացույցներով և չի վիճարկվում ամբաստանյալների կողմից»,- եզրակացրել է դատարանը։
Սա Ուկրաինայում ռազմական հանցագործությունների գործով երկրորդ դատավարությունն է ռուս զինվորների նկատմամբ։ Ավելի վաղ 21-ամյա ռուս սերժանտ Վադիմ Շիշիմարինը ցմահ ազատազրկման էր դատապարտվել Սումիի շրջանում քաղաքացիական անձի սպանության համար։
Տաթև Ֆռանգյան
