29.03.2026 | 11:43
Պենտագոնը պատրաստվում է Իրանում ցամաքային գործողությունների. The Washington Post
ԵՄ-ում կրկին չեն կարողացել համաձայնության գալ ռուսական նավթի էմբարգոյի շուրջ
Քաղաքականություն
30.05.2022 | 18:44
ԵՄ երկրների դեսպանները կրկին չեն կարողացել պայմանավորվել ռուսական նավթի ներկրման պատժամիջոցների շուրջ: Այս մասին հայտնել է BBC-ի թղթակից Ջեսիկա Փարքերը Բրյուսելից՝ վկայակոչելով դիվանագիտական իր աղբյուրներին։
Այսօր առավոտյան ԵՄ երկրների դեսպանները Բրյուսելում հերթական հանդիպումն են անցկացրել այդ հարցով։ Այն նշանակվել է այն բանից հետո, երբ կիրակի երեկոյան բանակցությունների արդյունքում չի հաջողվել փոխզիջման հասնել ռուսական նավթի ներմուծման արգելքի վերաբերյալ:
ԵՄ-ի կողմից ՌԴ-ի դեմ պատժամիջոցների 6-րդ փաթեթի ընդունմանը, որը ներառում է նաև ռուսական նավթի ներկրման արգելք, խոչընդոտում է Հունգարիան։
Անցյալ շաբաթ Հունգարիայի վարչապետ Վիկտոր Օրբանը նամակ էր հղել Եվրոպական խորհրդի նախագահ Շառլ Միշելին՝ նշելով, որ չի ցանկանում քննարկել ԵՄ-ի առաջարկած նավթի էմբարգոն դաշինքի առաջնորդների գագաթնաժողովում: Հունգարական կառավարությունը ռուսական նավթի ներկրման արգելքը համեմատել է իր տնտեսության վրա «միջուկային ռումբ գցելու հետ»։ Բուդապեշտը Բրյուսելից վնասի փոխհատուցում է պահանջում՝ ռուսական նավթից հրաժարվելու համար։
Էմմա Չոբանյան
